Pueblo tin tur derecho di haya sa ken ta cobra placa di Pueblo 

Ta ken no a yega di tende e exponentenan di AVP cuestiona y core campania cu e gobierno anterior a hinca miyones di Pueblo den huur di edificio, den oficina di abogado y den propaganda y mercadeo? Awor cu Fraccion di MEP a lansa e mesun preguntanan aki na Gabinete Eman den cuadro di tratamento di e Ley di Cuenta Anual 2013, e Gobierno aki ta nenga di contesta. Nan no kier mustra Pueblo ta cual ta e companianan cu ta cobra placa di Pueblo pa huur di edificio, pa ofrece conseho y haci propaganda y mercadeo pa Gobierno. Gabinete Eman awor ta core sconde tras di Ley di privacidad pa no duna cuenta, siendo cu esaki no por. Parlamento y Pueblo tin tur derecho pa sa unda fondonan publico ta wordo destina y kende ta cobra placa di Pueblo.

Parlamento ta e organo mas halto di control y sin infomacion no tin control
Si Parlamento ta e organo di control mas halto di Pais Aruba con por ta cu NO por haya TUR informacion pa por controla Gobierno di Aruba? Ora cu Gobierno ta haci uso di un oficina sea di abogado of ta busca un compania pa haci propaganda of mercadeo pa un of mas Minister, Parlamento MESTER por haya sa ta cual compania ta wordo paga cu fondo publico. E ta hasta ridiculo pa pensa cu Gabinete Eman ta purba sconde tras di un Ley di privacidad cu na 2013 a keda introduci pa awor keda sin mustra na Pueblo cual compania of persona ta huur edificio cu Gobierno y cuanto pago nan ta haya pa e servicio aki. Tambe ta imposibel cu miyones di fondo publico ta bay pa paga oficina di abogado pa bringa caso pa Ministernan di e Pais aki, anto Parlamento no por haya sa ta cuanto ta e gastonan envolvi y cual oficina a bringa e casonan aki. Mas aun, con por ta cu TUR Minister di Gabinete Eman ta haci uso di un compania of un persona pa haci propaganda y mercadeo pa nan y Pueblo no mag di haya sa ta kendenan ta esnan cu ta tin e contractnan lucrativo aki? Si Gobierno no ta duna e informacion aki, con Parlamento por controla si Gabinete Eman no ta abusadno di fondo publico of ta previligiando un grupo so?

Si Parlamento no por, e ora ARA ni CAD tampoco no por haya informacion
Awor si Parlamento no por haya informacion pa motibo cu Ley di privacidad ta prohibi esaki, ta con a para cu e informacion aki cu Algemene Rekenkamer y Centraal Accountantsdienst mester haya pa haci nan trabou? Nan tambe Gabinete Eman lo nenga informacion? Ta con nan ta controla si e placa a wordo corectamente gasta? Pasobra si Parlamento cu ta e organo di mas halto di control no por haya e informacion, e ora ni ARA, ni CAD lo por haya e informacion pa por haci nan trabou di control.

Gabinete Eman kier tene grupo selecta secreto pa Pueblo
E ta un berguensa cu Gabinete Eman ta mal interpreta y ta sconde tras di un Ley di privacidad pa no revela e nomber di e companianan y personanan cu ta wordo paga cu placa di Pueblo pa ofrece servicio di huur, abogacia y propaganda y mercadeo na Gobierno. Kizas pasobra nan no kier pa Pueblo haya sa con hopi Gabinete Eman a abusa di fondo publico pa paga placa bruto na un grupo selecta cu ta rondona Gabinete Eman. Pero esaki simplemente no por. Gabinete Eman mester duna cuenta na Parlamento brindando TUR informacion cu ta ser pidi y nan NO por sconde tras di Ley di privacidad pa sconde abuso cu fondo publico.

17 november 2015

Expresionnan haci den e articulo aki no necesariamente ta refleha opinion di ArenaPoliti.co