Perspectiva Independiente without background 001

Mester desmantela e refineria?

Aruba sin refineria. Algo cu hopi hende kier wak bira un realidad. Parse cu mayoria hende ta di acuerdo cu e refineria no por keda pa semper. Pero ki tempo e deseo aki mester bira un realidad? Mester desmantela e refineria mas pronto cu ta posibel? Of un reapertura cu lo habri e refineria pa 10-15 aña, mientras ta prepara pa reemplasa e industria, ta un miho opcion?

Realidad ta cu un reapertura di e refineria lo mehora Aruba su situacion financiero substancialmente. Segun e rapport di CFT, Valero tawata responsabel pa 12% di nos GDP. Un reapertura tambe lo tin un impacto hopi positivo riba cifranan di empleyo. Actualmente tin sondeo andando pa exploracion di gas dentro di awa teritorial. Si resulta cu tin gas, e refineria eventualmente lo por haci operacionnan den e industria di gas. Un reapertura por hasta baha prijs di coriente, considerando cu segun gobierno e aumento di e handling fee cu Valero ta cobra WEB ta e causa principal di e aumento di tarifa di coriente. Y e aumento di e handling fee ta directamente influencia door di ciere di e refineria.

Tur esey no kiermen cu no tin ventaha pa nos pais si e refineria wordo desmantela. Por explora alternativanan di industrianan mas ‘limpi’ pa reemplasa e refineria. San Nicolas y Seroe Colorado tambe lo por bira mas atractivo como area turistico sin e refineria. Desmantelacion di e refineria ta mustra di ta cuadra cu e plannan di gabinete Mike Eman II pa haci San Nicolas e segundo capital turistico, y tambe e plannan pa haci Aruba mas ‘green’.

December 2015
Recientemente minister de Meza, e minister encarga cu utilidad, a elabora riba e posibel desmantelacion. Segun e mandatario gobierno tin un settlement agreement cu Valero, enserando cu for di momento cu Valero reduci su personal cu mas cu 40%, of for di momento cu Valero stop di opera e refineria, un periodo di tres aña ta cuminsa cana. Si e refineria no wordo bendi durante e periodo di tres aña, Valero lo mester duna e refineria bek na gobierno di Aruba, of desmantela e refineria. Segun minister de Meza e periodo di tres aña lo termina na december 2015.

Confiansa
Hopi por pasa den un aña di tempo. Pero varios politico (y mas ciudadano) no ta confia Valero. Hopi ta mira Valero como un compania cu no ta tene cuenta cu interesnan di nos isla. It’s all about the money. Valero lo ta ‘hungando un wega sabi’ pa basta aña caba. Strategicamente nan lo a keda sera prome cu eleccion 2009, reuni cu representantenan di AVP (e tempo ey den oposicion), pa despues habri bek cu acuerdonan financiero mas faborabel pa Valero. Despues nan a sera atrobe, pero keto bay ta ganando placa via transshipment. Nan no ta invertiendo den modernisacion di e refineria. Enbes di opera e refineria, kisas cu un margen di ganashi mas abou, Valero ta tene e refineria sera y asina lagando hopi Arubiano sin trabou. Di parti di parlamentario Andin Bikker tambe tin e sospecho cu Valero no kier bende e refineria, pa e no bin den man di un competido.

Viabel
Pa basta tempo por a scucha for di diferente fuente cu e refineria no ta den bon estado pa sigui opera den termino largo. E refineria no lo ta viabel mas. Mientrastanto miembronan di MEP y PDR ta bisa cu tin companianan interesa, cu ta dispuesto pa cumpra y inverti den e refineria. Segun parlamentario Andin Bikker, e prijs average pa traha un refineria nobo ta alrededor di 10 biyon dollar, mientras cu pa 2.5 biyon dollar un compania por tin un refineria viabel na Aruba (500 miyon pa valor di e refineria, 2 biyon na inversion). PDR y MEP no ta convenci cu no por haya cumprado pa e refineria.

Transparencia
E berdad no ta facil pa yega na dje. Nos no por sinta den e reunionnan entre gobierno y Valero, y nos no por sigui negociacionnan cu cumpradonan potencial. Partidonan den oposicion ta bisa cu tin companianan interesa y cu por logra bende e refineria, pero tanten cu e partidonan no ta envolvi den negociacionnan, nos no lo haya sa si en berdad nan por logra of no. Al final nos tur sa cu e asunto di refineria na Aruba por nifica hopi voto pa un partido, sea mas of menos.

Kisas e miho manera pa trece transparencia na e situacion, ta si gobierno envolvi partidonan di oposicion den e proceso, y hunto busca cumprado pa e refineria. Den e forma ey, a lo menos pueblo lo tin mas confiansa den e proceso, y den e partidonan.

Duna bo opinion den e poll y seccion di comentario.

Klik aki pa lesa opinion di diferente partido tocante e refineria.

Kiko abo ta pensa?
  • Votes: 0%
  • Votes: 0%
Total Votes:
First Vote:
Last Vote:

 

 

 

 

 

 

 

 

 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.