Malcontento tur caminda! 

ORANJESTAD – E malcontento di cuidadanonan di nos pais ta wordo sinti tur caminda. Tur cos a bira caro, mientras cu e gobierno aki a priminti di elimina BBO. Hopi famia ta bibando den pobresa. Nos grandinan no ta hayando e cuido cu nan mester haya, y tampoco e cuido di salud. Aruba a para bira un pais masha insigur, y ni con duro e miembronan di nos Cuerpo Policial actua, e decadencia di e ultimo 6 anjanan, ta wordo sinti tur caminda. Nos muchanan ta hayando ensenjansa bou di condicionnan y calidad inferior, apesar cu e docentenan ta hasi nan maximo esfuerzo. Hopi ex studiante no por paga nan debe di estudio bek. Y e edad di hobennan adicto na droga ta birando cada biaha menos.
Y den tur e problemanan social aki, nos tin un gobierno cu a perde tur clase di credibilidad. Un gobierno cu a gana eleccion cu promesanan falso, promesanan cu e tabata sa cu e no por cumpli cu nan. Un gobierno cu a tuma decisionnan politico y asina a hinca nos pais den decadencia financiero. Un prome minister cu ta lucha deseperadamente pa laga un legado cu no ta di un lunatico, pero ta mira tur su esfuersonan bai perdi.
E gobierno aki no por saca nos di e desastre financiero cu nan a hinca nos pais aden. Nan no tin ni e minimo intencion di sanea e situacion financiero, y si nan tabata kier mes, nan no por. Nan a demostra esey caba den e ultimo 6 anjanan aki. Y kiko e resultado ta? Mientras nan tabata yena nan saconan, nan a redobla debe di nos pais. Nan a hipoteca futuro di nos yiunan y nan yiunan.
Y ainda nan tin e pen den nan man pa sigi endeuda nos pais. Y nan a demostra caba cu nan lo no stop, pasobra apesar cu tin CFT, toch nan a sigi cu e Green Corridor, nan a sigi cu e Green Conference , nan ta sigi cu 9 minister, nan ta sigi biaha y sigi fiesta.
Esaki tin e pueblo fada, harta y rabia. Esaki a pone hopi cuidadano bira lomba pa e gobierno aki. Na e alturanan aki nan no sa kiko nan tin na e gobierno aki cu tin un lunático na cabes.
Aruba ta pasando den momentonan hopi tenso, pueblo ta lantando, cosnan ta rebolteando. Y e gobierno no ta hasiendo nada pa calma e situacion, es mas, e único reacción di e minister presidente ta pa agita y instiga su hendenan pa busca problema.
Aruba, kiko lo keda di bo, despues di e tempestad cu yama Gabinete Mike Eman? Dios spaar nos.

Expresionnan haci den e articulo aki no necesariamente ta refleha opinion di ArenaPoliti.co