Perspectiva Independiente without background 001

Gerick Croes (MEP): Gabinete Eman ta fiesta ignorando cu pueblo a bai atras y ta den miseria!

Gerick13
Den un comunicado anterior nos a pone enfasis riba e hecho cu loke Gabinete Eman duna e ta kite bek for dibo. Lamentablemente e efectonan di medidanan ta keda acumula y afecta e calidad di bida di pueblo degenerando e status sociaal di famianan. Ademas di ley y medidanan tuma door di gobierno tin decisionan aproba cu literalmente ta cabando cu e cuidadano entre otro e aumento di coriente y costo di bida.

Si pueblo a tuma bon nota e situacion a bira uno basta alarmante pasobra hopi famia no ta logra cubri necesidadnan basico pa nan hogar cualnan ta awa, coriente y cuminda. Nos ta considera cu tur hogar lo mester tin coriente y awa como necesidadnan basico pero cifranan actual ta demostrando cu hopi den nos comunidad no por logra cumpli cu esaki. E informacion confirma cu 12 mil cas na Aruba ta core retraso y riesgo pa nan meter wordo corta ta confirma cu e situacion sociaal na Aruba ta un fase di deterioracion. Considerando cu poco tempo pasa e suma di esnan cu un retraso tawata 4 mil y actualmente a crece cu 300% bira 12 mil ta señal cu medidanan y decisionan tuma door di Gabinete Eman ta perhudicando pueblo y afecta calidad di bida negativamente.

Pero banda di e necesidad di awa tambe ta importante pa dedica atencion na e prijs di coriente. Den e tabel akibou bo ta tuma nota cu e prijs averahe di coriente ultimo tempo a subi cu alrededor di 15%! Logicamente esaki ta trece consecuencianan cune riba e presupuesto mensual di cada famia pa loke ta trata nan gastonan na cas. Pero tene na cuenta cu aumento di coriente ta pone cu prijsnan di producto ta subi na supermarket pasobra e comerciante lo trata na
cubri e aumento. Akinan no ta 1 biaha so e cuidadano ta sali e "dupe" sino multiple biaha.

021215 gerick 1

Costo di bida a subi drasticamente!
Ademas di aumento di tarifanan di utilidad manera di coriente e cuidadano ta confronta su mes cu e realidad cu loke e ta gana awendia pa medio di labora duro no ta yega mas pa por logra cubri e necesidadnan cu su famia mester. Esaki sigur ta di lamenta pasobra e famia no por hiba un bida manera debe ser. Pa colmo e efecto di medidanan bou Gabinete Eman ta pone e cuidadano riba dje sigui bai atras. Hustamente esaki ta loke e cifranan di CBS ta indica.

021215 gerick 2

For di e cifranan den e tabel kiriba bo por conclui cu hopi cuidadano ta bibando bou di nivel di subsistencia cual nifica bou di e nivel di entrada pa nan por sobrebibi ( pa cubri necesidadnan basico). Si nos djis tuma como ehempel e costo di bida pa un solo adulto esaki ta di 2075 florin! Si compara esaki cu e suma di 2009 cual tawata 1395 bo ta constata un aumento drastico di costo di bida di alrededor 49%!

Actualmente tur loke nos a menciona ta sosodiendo den combinacion y riba dje un mal maneho financiero di parti Gabinete Eman ta caba di deteriora e status sociaal di nos comunidad. Ta di lamenta cu awendia pueblo ta bisa cu placa no ta yega pero no mester ignora e hecho cu Gabinete Eman a contribui na e aumento di costo di bida. Pero manera semper tanten pueblo no para nan Gabinete Eman lo continua na fiesta mientras pueblo ta den miseria!


NB. cifranan usa den e articulo ta origina di statistical yearbook 2009 y CPI 2015

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.