Perspectiva Independiente without background 001

MEP: Marisol Lopez-Tromp y Mike Eman a desprestigia Parlamento

FraccionMEP11
ORANJESTAD – Parlamento diamars ultimo a trata e presupuesto di Parlamento pa 2016, y durante e debate publico e fraccion di MEP a revisa e maneho hiba den Parlamento den ultimo anja, cu a condusi cu e autonomia financiero di pais Aruba a bai perdi. Cu esaki Parlamento a wordo degrada pa un organo cu antes tabata tin e ultimo palabra, pero ya no mas. Esaki a causa e desprestigio di Parlamento, y MEP a demostra cu tin dos culpable pa esaki: Marisol Lopez-Tromp y Mike Eman.

E problema a cuminsa cu Mike Eman, cu a hiba e peor maneho financiero cu pais Aruba a mira den su historia, pero esaki combina cu e dictadura cu Marisol Lopez-Tromp a aplica den Parlamento, den cual a silencia oposicion di tur forma, a causa cu finalmente Hulanda a forsa e CFT, cu awor ta e autoridad cu ultimo palabra.
Pasobra si ta berdad cu e problemanan a cuminsa na anja 2009 desde cu Mike Eman a tuma mando, nan a escala rapidamente na mitar di 2014, cu tratamento di e presupuesto 2014, y a culmina den e ley di CFT tres luna pasa.
Parlamentarionan di MEP a repasa e hechonan aki durante e debate den Parlamento, pa asina ningun hende lubida ken ta responsabel pa e desprestigio aki.

2014
Na juni 2014 riba un dialuna anochi 11’or gobierno a entrega e presupuesto na Parlamento. Manera cos cu Parlamento ta un bar habri 24 ora, na e ora ey presidente di parlamento a ricibi e presupuesto. Parlamentarionan a haya esaki diamars y ysa pa diahuebs mester a studi’e, y entrega tur nan preguntanan. Pero e preguntanan por a wordo hasi verbalmente so riba e diabierna, y den un limite di 30 minuut. Manera cu si no ta poco, ya pa dialuna e debate publico mester a cuminsa, full speed, den cual a limita cada Parlamentario na 3 minuut pa cada ministerio. Tur esaki pasobra gobierno kier a bulldoze e presupuesto scondiendo informacion pa Parlamento. Informacion cu a bira conosi te despues cu e mayoria den Parlamento a aproba e presupuesto. Den menos di dos siman cu e presupuesto a wordo entrega na Parlamento, ya e mayoria a canta VOOR. Y despues e problema a sinta na momento cu Gobernador a nenga di firma pa 6 luna, pasobra cu Mike Eman y Juan David Yrausquin a firma desde februari 2014 caba cu lo acepta supervision financiero di CFT, pero no kier a cumpli. Cu MIke Eman y Juan David Yrausquin a enganja y manipula Parlamento, ta algo cu a pasa mas biaha. Pero esun responsible principal pa e berguensa aki, ta e presidente di parlamento Marisol Lopez-Tromp, cu a hunga e wega baho aki, pa tapa e berdad, pa silencia oposicion. Esaki finalmente a causa e CFT cu ta e desprestigio grandi di e parlamento aki.

Reunionnan pidi pa oposicion NO ta wordo yama
Oposicion tin un lista largo di reunionnan pidi cu no ta wordo yama. E presidente di parlamento ta yama reunionnan solamente ora ta combini gobierno. Oposicion por splica y argumenta cuanto cu kier, pero e presidente di parlamento tin oido solamente pa e urgencia di Mike Eman y su ministernan. Oposicion ta wardando casi dos anja pa trata e proyecto di hospital, e cierte di Valero, e escandalo y fraude di Hard Rock Café, e dump na Santa Cruz, problema di asbest na scolnan na Pos Chikito, abuso policial durante manifestacion dia 1 di oktober 2015, escandalo di hedging na WEB, pero e presidente di parlamento riba su mes a dicidi cu esakinan NO ta importante y sin duna ningun splicacion ta keda sin yama nan. Cu esaki e ta desprestigia Parlamento na un aparato di aplauso pa gobierno.

27 augustus 2015
E berguensa causa na Parlamento a sigi ora cu tanto oposicion como gremionan a urgi e presidente di parlamento pa scucha e dolornan den comunidad pa cu e ley di CFT, sinembargo e presidente di parlamento na forma dictatorial a nenga esaki. Pero mas ainda, a enganja e gremionan y tene nan na linea, ganjando nan cu e lo papia cu nan prome cu e reunion caba, pero no a hasi tal. Un presidente di parlamento cu a bisa cu e tin tur cos bou di control, tanto paden y pafo di parlamento, siendo cu paden di parlamento el’a permiti matonnan drenta pa menasa y intimida oposicion, y pafo tur hende sa kiko a pasa. Y en bes di aplica transparencia e ora si, a core kita tur prueba den nan contra, prueba cu meste rdemostra kennan a tira desde paden den parlamento riba e multitud di hende para pafo. Pa colmo, supuestamente no tin grabacion di tur locual a socede den e sala di parlamento. Miles y miles di florin a wordo gasta den un sistema pa graba reunion, pa transmiti reunion, pero desde e dia ey bo por conta cuanto reunion a logra wordo transmiti, of graba. Practicamente NINGUN.

Esakinan ta apenas algun ehempel con Marisol Lopez-Tromp a desprestigia e instituto di Parlamento cu awe ya no tin e autoridad final mas riba tereno financiero. Awe ta CFT tin autoridad final. Ni si un parlamentario kier presenta un amienda, ta solamente si CFT haya e amienda na su lugar, e ora e ta pasa, sino Gobernador ta keda sin firm’e. E desprestigio aki conose dos culpabel: Marisol Lopez-Tromp y Mike Eman y pesey Marisol Lopez-Tromp no por conta riba e confiansa di oposicion pa cu su maneho.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.