Aruba ta den ambiente di carnaval, cu pa un gran parti di nos comunidad ta nifica un explosion di creatividad, musica y principalmente fiesta.

Na e mesun momento aki tambe ta tumando lugar na Parlamento di Aruba tratamento di e presupuesto 2016.
Un presupuesto cu mester a wordo trata ya caba prome cu fin di 2015, pero cu a haña aprobacion di e gobierno di Reinado, riba peticion di CAft, pa wordo posponi cu un luna.
Tratamento casi mester a wordo posponi atrobe pa motibo di un desacuerdo grandi entre un minister y e resto di su coleganan den Conseho di Minister, cu hasta a entrega su retiro na su excelencia Gobernador.
Manera tabata di spera, e tragi-comedia aki a conoce mesun "happy ending" cu e supuesto welga di hamber di nos prome minister, un brasamento y declaracion di amor infinito na otro.

Obviamente tras di cortina otro guy lo a canta.
No ta sin mas cu e minister di turismo a haña ta necesario pa lansa un critica asina formal contra su coleganan y sr. Eman.
Den mi experiencia como politico y gobernante, un acto manera inicia door di e minister di turismo lo mester a cumpli cu un proposito, pasobra bo no ta bay declara publicamente bo indignacion na unda bo ta duna di conoce cu sr. Eman no sa con pa maneha e gobierno, y su coleganan ta hiba un maneho sin pia ni cabes.
Cualkier persona cu un tiki weso di lomba lo no a acepta un difamacion asina sin mas.

Nos lo por sinta na banda, y aprecia o lamenta e falta di sinceridad di e integrantenan di e gobierno mas malo di nos historia politico, pero aki ta trata ministernan.
Personanan cu ta supposed di carga e responsabilidad pa guia nos pais di un forma serio y adecuado.
Personanan cu mester duna un ehempel na nos comunidad pa medio di bon comportacion a base di respet mutuo y bon comunicacion.
Personanan cu mester duna un contenido real na loke ta nifica bon gobernacion.

No ta conoci kiko exactamente e critica di sr. Oduber ta encera, pero loke sí nos a bin ta ripara, ta gastamento di placa sin cu ta responsabilisa esaki na parlamento ta sigui tuma lugar, repartimento di tereno ta na ordo di dia, no ta respeta e poder hudicial y ta keda haci nombracionnan sin cu ta haña ta necesario pa cumpli cu e procedura di un solicitud habri, manera a tuma lugar cu nombracion di e Director di CBS y tambe e Director di WEB.
Tambe a nombra un Director di Salubridad cu no ta cumpli cu e condicionnan necesario. Unda e voz di e sindicatonan a keda?

E presupuesto cu Raad van Advies y CAft a denomina como irealistico, lo wordo aproba y asina habri caminda pa sea intervencion door di gobierno di Reino, of loke mas bien mi ta kere, cu lo bay sosode: e "party goes on"!!
"It’s party time y payback time" pa esnan cu a financia e partido na mando y esnan cu a duna apoyo incondicional na e ministernan, sin cu a tene na cuenta cu si nan tin e capacidad pa eherce e trabou.
Na final di cuenta e gran perdedor no lo bay ta e ministernan of nan aliadonan, pero e pueblo di Aruba cu lo sigui entrega su autonomia y lo sigui cay den e gara di pobresa y criminalidad pa motibo di interesnan partidista y personal.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 27, 2016

Expresionnan haci den e articulo aki no necesariamente ta refleha opinion di ArenaPoliti.co