Perspectiva Independiente without background 001

Partido ABO: Chichi ta puntr’abo...

ABO
Parlamentario Chris Dammers a duna un entrevista patras di ex-Bushiri Hotel unda e ta duna di conoce cu ta pensando awo pa bin un ‘beach stadium’ pa hunga ‘beach futbol’. E ultimo cu Chichi ta corda ta cu ta basha e hotel abou y ta laga e tereno habri. Por fabor, ya caba no ta consulta cu pueblo pero si ta sigui bin cu ideanan cu no tin impacto real riba nos economia. Por fabor, no mishi mas cu medio ambiente y duna pueblo e beach di Bushiri bek!

Chichi no ta kere cu Reuters ta saca informacion infunda. Despues di tur e FANFARIA cu a haci na television tocante apertura di e refineria, ta resulta awo cu Aruba ta leu ainda di un deal serio cu ta beneficia pueblo. Chichi ta desea di mira e contractnan prome cu nan wordo firma pa asina ta sigur kico gobierno ta hinca e pais aden.

E falta di un vocabulario amplio y conocemento di idioma Papiamento ta un iritacion constante. Mi kiermen, bo por kiboca, pero ta consciente cu tin un diferencia enorme entre aña 1.900 y  aña 19.000 (mil nuebe shen y diesnuebe mil). Prepara bo mes debidamente ora ta trata divulgacion di informacion na medionan di comunicacion, tanto skirbi como papia. Respeta bo mes, respeta nos Cultura...tuma un curso di Papiamento.

Tempo ta pasa lihe y pronto eleccion ta den porta. E proyecto P(a) P(ueblo) P(aga), esta e Green Corridor cu di ‘green’ no tin nada, ta bay keda cla na augustus di otro aña 2017. Gobierno ta manera pura. Pa kico tanto ansha? Acaso no ta sigur cu gabinete Mike Eman III lo sigui na mando absoluto atrobe?

Chichi kier mira hende decisivo den e siguiente gobierno cu ta respeta opinion di pueblo. No un gobierno cu ta sconde tras di ‘dialogo social’ cu e.o. sindicatonan cu ta representa apenas un porciento chikito di e total di poblacion. Chichi kier mira hendenan serio den politica cu ta splica na placa chiki’ con ta bay drecha e tantisimo problemanan di nos pais.

E 10.000,- ‘bubu’ di recompensa pa captura di Yellow a keda aden. Yellow su carch’ i bingo a hunga pero e premio mayo no a cay. Comisario Richardson a laga sa cu ta ‘puzzel’ polis a ‘puzzel’ poniendo tur e tipnan hunto pa yega na e adres unda Yellow tabata scondi. A keda demostra cu pueblo a coopera y a cumpli cu su deber civico sin spera recompensa.

Chichi ta haya cu Salubridad Publico no mester sinta warda te ora publico haci keho. Chichi a toca e tema di smaak straño di insecticida cu mayoria comestibel den supermercadonan Chines tin pa varios aña caba y riba cual nada ta wordo haci. Pa kico no ta uza e sistema di ‘control sorpresa’ y hiba muestra pa manda laboratorio haci test pa mira cu kico nan ta contamina? Corda informa pueblo y boet of cera esunnan cu ta atenta contra salud di pueblo.

Chichi a tende na radio cu varios turista na Divi Links a bira malo dor cu nan a bebe awa di cranchi di Aruba. Con por ta posibel? Otro atraco riba nos unico pilar economico! Lo ta cu un hende a habri e cranchi pa robes??

Bon, no por tabata otro cu Zika mester a yega Aruba. Ta con por pensa cu e por bay tur caminda menos Aruba? Accion di ‘swipe’, esta fumigacion di e sangura Aedes Aegypti ta bay cuminsa. Chichi ta curioso, si tanto GKMB ta bisa cu e producto cu ta wordo uza pa fumiga awendia ta ‘green’, anto pa kico esunnan cu ta cana spuit ta bisti masker anto? Kita e masker pa mustra cu e ta peligroso pa salud di hende, paso pueblo si no ta haya masker pa bisti.

Y nada, ningun movecion di parti di gobierno pa cu e dump di Parkietenbos. Ta di spera cu reunion cu Parlamentario Donny Rasmijn a pidi, lo tuma luga pronto. Mester ta serio si y laga teatro politico un banda pa yega na solucionnan concreto cu implementacion directo. Green green green... anto na Aruba tin dumpnan den aire liber... Otro biaha cu ‘green people’ bin bishita nos pais, corda mustra nan e dumpnan aki tambe.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.