Ministerio encarga cu Economia y Medio Ambiente, Wolffs Company y SETAR ta cuminsa proceso pa evalua relacion di naturalesa y economia di Aruba 

ORANJESTAD – Diahuebs mainta representantenan di diferente sector den nos comunidad a atende e convocacion pa un sesion educativo cu enfoke riba e balorisacion di naturalesa na Aruba. E actividad cu a tuma luga den e facilidadnan di MFA-Noord, tabata organisa pa Ministerio di Asuntonan Economico, Energia, Comunicacion y Medio Ambiente hunto cu Wolffs Company y SETAR. Reparti entre presentacion parti mainta y ehercicionan den e di dos parti atardi, e obhetivo tabata pa compronde e relacion entre naturalesa di Aruba y su economia. Na di dos luga, identifica cua ta e balornan cu ta mas importante pa evalua.

Camara di Comercio, NGO’s, Utilities N.V., AAA N.V., Universidad di Aruba y departamentonan publico, como tambe varios profesional hoben tabata invita na e evento. E aporte di cada sector ta importante den e fase di estudio cu ta inicia. Francielle Laclé di Yabi Consultancy tin e tarea di dirigi e esfuersonan aki. E tin experiencia despues di a haci un trabou similar na Boneiro.

Pa Gabinete Mike Eman II tabata obvio cu nos isla tin mester di mas y miho informacion riba tereno ambiental. Consehero Principal di Ministerio di Asuntonan Economico, Energia, Comunicacion y Medio, Sr. Richard Arends a duna di conoce cu medio ambiente ta un di e carteranan di mas compleho cu Gobierno tin pasobra “e ta bou di un presion constante y enorme di caracter economico, urbano y social y loke ta haci’e mas compleho ta cu cualkier accion tin su efecto riba termino largo.”

Papiando den nomber di Minister Mike de Meza, kende no por tabata presente pa motibo di kebrante di salud, sr. Arends a splica cu e Ministerio y su oficina ta combenci cu desaroyo economico sostenibel mester bay man den man cu un politica di medio ambiente cu por sostene e otro pilarnan. Convencionalmente, desaroyo economico ta wordo midi na inversion, importacion y exportacion, entre otro. “Pero nos sa cu tambe tin otro factornan cu no tur ora por calcula, wak y sinti, pesey a hala nos atencion hopi e estudio aki di TEEB” (The Economics of Ecosystem Services and Biodiversity).

Politica di medio ambiente no ta algo cu Gobierno por haci su so; pesey ta invita stakeholders pa hunto duna forma, combibi e proceso y transmiti esaki na comunidad. “E ta algo cu henter comunidad mester carga,” e ehecutivo a bisa na esnan presente.

Director di Directie Natuur en Milieu, Gisbert Boekhoudt a pone enfasis cu naturalesa ta un “common good,” dus e ta pa tur hende. “Ta traha riba maneho di naturalesa no solamente pa nos mes y nos yiunan, pero e yiu di nos yiunan tambe; no solamente pa nos mes, pero tambe pa esnan cu ta bishita nos.” E director ta di opinion cu e estudio cu ta bay duna un balor na naturalesa ta bay permiti tuma nota di, no solamente loke ta kita, pero tambe di con hopi ta inverti.

Durante e proximo aña tur e stakeholdernan menciona ta bay traha hunto den un estudio cu pa prome biaha ta tuma luga na Aruba y cu hopi ta anticipa lo ta di gran balor ora di fiha e maneho di medio ambiente. E presentacion titular “Capital Natural na Aruba” a wordo haci dor di Profesor Peter van Beukering, director di 'Institute for Environmental Studies' na Amsterdam.

Expresionnan haci den e articulo aki no necesariamente ta refleha opinion di ArenaPoliti.co