Prome Minister Eman despues di reunion 

ORANJESTAD – Preservacion di naturalesa, tanto maritimo como na tera, y cu e maneho sostenibel den mente Prome Minister Mike Eman durante un bishita na Merca a topa cu delegadonan di  Nature Conservancy Aruba Institute.

“Protecting the lands and waters on which all life depends” ta meta di e organisacion Mericano aki, cu ta un di esnan mas importante na mundo. Esaki pa motibo cu awendia mas cu nunca un parti di nos naturalesa di mundo ta na peligro. “Pesey nos trabou ta crucial pa mantene habitatnan crucial y especienan unico di bay perdi pa semper.”

E encuentro aki ta algo cu a wordo prepara for di aña pasa na momento cu Prome Minister Mike Eman a topa cu ehecutivonan di e fundacion di Presidente Bill Clinton. Nan ta traha pa conserva bida marino y esun na tera. E trabou cu e organisacion aki ta haci ta importante den e meta cu Aruba a pone pa ta sostenibel. Door di bira sostenibel den sector di energia pa 2020, Aruba ta yuda protege medio ambiente.

Prome Minister Eman a splica cu e cambio di e maneho convensional di conversion di energia pa uno hopi mas berde, tin hopi aspecto cu ta conta. Tin e aspecto social economico, cu ta percura pa un miho distribucion (y husto) di entradanan di e pais, participacion di ciudadanonan den decisionnan importante, modelonan di participacion manera Townhall Meeting y Dialogo Social, etc. Den tur esaki proteccion di medio ambiente, di e flora y fauna, ta hunga un rol hopi importante. Prome Minister a señala e conservacion y trece bek cierto especie di lama ta algo cu e instituto cu el a reuni cune por yuda Aruba cune. Nan por yuda pa haci un inventarisacion con e bida marino ta, pero tambe e flora. Pero tambe yuda trece mas berde den centronan di ciudad y den e barionan, duna mas bida na e medio ambiente. Di e forma aki ta aumenta e presencia di naturalesa den e pais, y alabes reenforsa e calidad di bida y aspecto estetico, creando un ambiente mas agradabel.

Nature Conservancy Institute ta hungando un rol importante na 9 isla Caribense, guiando e maneho pa trece bek coralnan cu a bay perdi, cultivando coralnan den laboratorio cu ta tumando menos tempo pa crece cu ora nan ta den lama. Despues cu nan yega na cierto tamaño ta pone nan den lama.

E  mandatario a haci un invitacion na e organisacion pa bishita Aruba y mira e desaroyo den flora y fauna di e isla. Hunto cu e instituto aki kier desaroya un strategia con pa conserva y haci mas atractivo e espacionan protegi den Parke Arikok, cu Parlamento a pidi pa aumenta tambe. “Riba e area di proteccion maritimo nos tin un caminda largo pa cana ainda, nos tin decisionnan importante pa tuma. Pesey e reunion y partnership cu e instituto aki lo ta un impulso pa e voz di esnan cu na Aruba pa hopi tempo a pidi atencion pa e temanan aki,” Eman a duna di conoce. 

Expresionnan haci den e articulo aki no necesariamente ta refleha opinion di ArenaPoliti.co