Maneho di gobierno ta refleha con e ta pensa di su comunidad, con e ta pensa di su hendenan, di nan futuro y di e oportunidadnan pa un bida digno. E maneho financiero y economico di un gobierno ta bisa bo tambe con gobierno ta pensa pa crea desaroyo pa su ais y su hendenan. Den tempo di crisis, bou presion di necesidadnan den pueblo,e desicionnan di gobierno ta mustra ainda mas con e ta pensa di yuda su pais y su hendenan.
E forma cu gobiernonan di MEP y AVP a maneha finansa y economia, con nan a actua y kico nan a dicidi den tempo di crisis, ta bisa con nan ta pensa. E diferencia entre e forma cu MEP a maneha economia y finansa den tempo dificil, compara cu e moda cu AVP a actua, ta resalta e diferencia entre e dos partidonan. MEP ta pensa cu den tempo dificil mester tuma MEDIDA y corta gasto tur caminda. AVP ta pensa cu mester stimula economia, crea trabou y entrada, pa asina sali di e crisis. E ultimo gobernacion di MEP y di AVP (for di 2009), ta ilustra e diferencia grandi aki bon. PDR de lo contrario, bo no sa unda e ta para awe, laga para mayan.

MANEHO Y SU RESULTADO
Ora nos economia a cay cu 15% den dos aña (2008-2009) e solucion di MEP tabata pa tuma medida. Ora AVP a drenta gobierno a scohe pa NO sigui e mal ehempel di MEP, pero pa STIMULA nos economia. A crea incentivonan pa inversionistanan, a inverti den infrastructura y forsa di compra. A habri e refineria y a inverti den enseñansa. E resultado: bou MEP economia a bay atras. Cu e maneho di AVP economia di Aruba a crece cu entre 13% y 15% den apenas seis aña!
Ora MEP a core entre otro cu e refineria y otro companianan, MEP no a pensa di tuma desicion pa proteha nos economia y e cuponan di trabou. Pesey desempleo a subi te na 12% na 2009. E maneho di AVP, di stimula economia, habri e refineria, inverti den infrastructura a crea cupo di trabou nobo. E resultado: awe desempleo a baha te na 7.5%.
E filosofia di MEP di "tuma medida pisa pa sanea nos finansa publico y asina incentiva sector priva pa inverti," no a funciona niun caminda na mundo. Pero esey tabata e pensamento di henter oposicion di MEP y PDR for di 2009.
De lo contrario, nos ta wak cu e maneho di AVP, di stimula economia door di habri e refineria y inverti den nos pais pa crea trabou y di mehora forsa di compra, si a duna resultadonan concreto. E echo tambe cu awor si pueblo ta wak unda su placa ta wordo inverti, ta nifica cu contrario cu bou gobierno di MEP, ta Pueblo ta esun cu ta beneficia. No un grupito! Pero keremi.....ainda falta!

Expresionnan haci den e articulo aki no necesariamente ta refleha opinion di ArenaPoliti.co