Andin Bikker (PDR): PDR contento cu dos amienda historico a pasa den Parlamento cu sosten amplio
Den rueda di prensa Parlamentario Andin Bikker, lider di fraccion di Partido Democracia Real a expresa di ta contento pasobra door di un sosten amplio Parlamento, pa pasa dos amienda historico di PDR.
El a splica cu Codigo Civil ta consisti di 8 buki, un di e amiendanan ta regarda buki 5 di Codigo Civil capitulo di propiedad. E amienda aki ta pa financia na un manera mas facil e “power-walls” cu ta e celnan cu por pone den cada hogar pa recarga energia den oranan di anochi, cu WEB tin hopi capacidad di reserva di energia cu e cliente por haya na un tarifa mas barata, of pa panelnan solar cu tambe pa instala nan e amienda aki ta facilita su financiamento.
E di dos amienda ta e ley di proteccion pa e personanan cu ta haya nan mes cu un herencia cu debenan scondi. Parlamentario mr. Bikker a subraya cu tur dos amienda ta innovativo, y cu nan Aruba ta mas dilanti cu Hulanda mes.
Esun di power walls y panelnan solar tur dos ta invencion di PDR cu Hulanda mes no conoce y e ta kere cu aya, nan ta bay adopte tambe.
E proteccion riba personanan cu ta hereda Hulanda a introduci esaki y PDR a bin descubri un fout den dje. El a tuma tuma contacto cu Ministerio Pulico na Hulanda, door cu e ta traha estrechamente cu nan pa loke ta leynan manera na aña 2010 cu nan a coopera cu Aruba pa introduci e ley pa casonan di belasting por bay te Corte Supremo, y aki Hulanda mester a haci un esfuerzo pa cambia su leynan tambe, segun Andin Bikker a splica.
Nan a haci e cambio na Islanan BES cu ta cay bao di Hulanda, como tambe na Sint Maarten, Curacao y Aruba. Despues cu Andin Bikker a ripara riba e fout y a notifica Hulanda, nan a haci e coreccion y mande bek pa su persona anto pa Aruba el a keda drecha caba.
“Na Hulanda aki un par di luna nan ta bay drecha e foutnan chikito cu nan tin den nan ley original. Mi ta lamenta cu e bukinan di 3 te 8 cu ta carga nos economia, nan no a haya e atencion debido pasobra atencion a bay riba un amienda cu ta pa ehecuta e decision di Corte Europeo di Derechonan Humano” na final Andin Bikker a bisa.
Expresionnan haci den e articulo aki no necesariamente ta refleha opinion di ArenaPoliti.co