Perspectiva Independiente without background 001

Parlamentario mr. Xiomara Maduro (MEP): Integridad financiero ta depende di integridad den gobernacion tambe

XM67
No por keda pasa ley so pa cumpli cu FATF, nos mester actua tambe. 

E siman aki Parlamento a pasa un otro ley pa por cumpli cu e recomendacionnan di FATF contra labamento di placa y financiamento di terorismo. Ta trata di e ley pa regula bolsa di valor. Aunke na Aruba mes no tin un bolsa di valor, e ley aki ta crea e toolsnan necesario pa Banco Central por actua. Den pasado basta cuidadano di nos Pais a keda perhudica ora cu nan a deposita fondo den proyecto di Playa Blanca NV y tambe Stanford Group, y ora cu cosnan a bay robes nada por a wordo haci como cu nan no tabata cay bou di supervicion di Banco Central. Cu e ley cu a pasa Banco Central ta haya e toolsnan necesario cu ta brinda seguridad tambe na e consumidor. Tur esaki ta bon, pero na nos opinion bo no por keda pasa leynan so pa cumpli cu FATF, nos mester actua tambe. Sigur ora bo ta haya senial cu den gobierno mes tin cosnan pasando cu ta atacha e integridad di nos sistema financiero, pasobra integridad financiero ta depende di integridad di gobenacion tambe. 

Integridad financiero ta depende di gobernacion integro 
Tur e leynan cu ta wordo introduci na nos Pais a base di e recomendacionnan di FATF ta pa evita cu e sistema financiero di nos Pais wordo malusa pa criminalnan por laba placa of pa por financia terorismo. E sistema financiero mester keda integro. Pa logra esaki bo mester por conta cu e gobernacion tambe ta funciona na un manera drechi y integro. Pasobra na momento cu e gobernacion di bo Pais no ta integro, bo ta habri porta hancho pa criminalnan abusa y atacha e integridad di bo sistema financiero cual ta hustamente locual bo kier cuida pasando e leynan pa cumpli cu FATF su recomendacionnan.

Senialnan cu ta exigi accion
Na e momentonan aki tin senialnan fuerte cu ta indica cu den gobernacion Minister Sevinger ta actuando na un manera cu no ta integro ora ta trata di otorgacion y cambio di destino di tereno. For di e pruebanan cu ta sali na cla bo ta mira cu un netwerk ta birando visibel di hendenan liga na e mandatario cu ta haciendo negoshi cu e firma di e Minister. Asina a pasa tambe na nos hermana isla Boneiro na 2009 na unda cu tabata duna tereno na un solo grupo di persona cu despues tabata haci negoshi na grandi cu nan. Ora cu FIOD y Nationale Recherche di Hulanda a haci investigacion a bin sali na cla cu e netwerk tabata wordo usa pa laba placa haya di negoshi illegal cu droga y contrabanda di oro. Pesey na momento cu na Aruba nos mira e mesun practicanan aki bira visibel, nos no por keda ciego pa nan. E senialnan aki ta exigi accion di parti di tur instancia cu ta controla y investiga na nos Pais pa investiga e falta di integridad aki den gobernacion ora ta trata di otorgacion y cambio di destino di tereno.

Si na Boneiro por investiga, na Aruba tambe mester por
Den e caso na Boneiro na unda cu deputadonan e tempo ey a haci deshaci cu tereno, Boneiro no tabata dispone di tur experticio pa haci e investigacion y pesey Hulanda a cay aden pa investiga. Aruba na e momento aki ta conta cu tur instancia cu por investiga kiko ta pasando cu un famia so ta hayando tur tereno. Pesey si na Boneiro por a investiga un caso similar, na Aruba tambe mester por. Pasobra nos no por keda pasa ley so pa cumpli cu FATF, nos mester actua tambe!

16 september 2016

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.