Perspectiva Independiente without background 001

Chris Romero (MEP): Gobierno di AVP no ta interesa den conserva Aruba su medio ambiente

ChrisRomero26
Den futuro ora e siguiente generacion wak bek riba Gabinete Mike Eman I y II, lo por conclui cu aparte di mara e siguiente generacion na debe, su unico logro lo ta apertura di un refineria cu nan no kier a habri y cu ta pueblo y oposicion a pone presion nan pa habri’e. Momento cu pueblo a haya sa cu si tabata tin interes p’e refeneria, AVP no por a sconde mas  y mester a duna pueblo su kier.

Un Gobierno cu a bay campaña cu tur cos “green”, no por y no tabata kier hasi nada pa nos medio ambiente. Dump ta sigui na candela y bubali plas ta sigui wordo rosa. 90% di e energia berde tabata t’ey caba ora nan a drenta Gobierno na 2009 y t’e awe no muchu a wordo hasi riba leynan pa cu nos medio ambiente. Aki ta unda mi ta puntra e Gobierno aki; ta ki tanto “green” boso a hasi anto?

Awe, pa scapa cara di Mike Eman, den prensa internacional nan lo bay yama nos refineria un “green refinery”. 
Tin un projecto pa bin cu gas for di Venezuela, sin importa e situacion politico y decadencia social cu Venezuela ta aden, cu ta hasi di e pais aki un bom serca di explota. No mal interpreta mi den esaki, pasobra personalmente mi ta hay’e un tremendo idea pa bin cu gas na Aruba, pero dicon pa 7 aña largo no por a bin cu un idea pa alivia e situacion di e  dump na parkietebos?
Pakiko no a bin cu otro alternativa na lugar di rosa un parti di Bubali Plas?
No ta “Green” e Gobierno aki ta?
Loke cu nos tur por mira indudablemente ta cu AVP y Mike Eman ta “Green” pero “Green” di placa, pasobra medio ambiente nunca tabata y ni lo bay ta nan prioridad.
Awor nos lo haya un “green refinery” pa purba scapa cara internacionalmente, pero tin un dicho na spaño cu ta bisa “mona que se vista de ceda, mona se queda”.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.