ORANJESTAD – Maneho di integracion tambe ta forma un parti importante den e rehabilitacion y reapertura di refineria na San Nicolas. Riba e aspecto aki tambe Minister Sevinger a sa di contesta e preguntanan cu el a ricibi for di miembronan di Parlamento. Diamars mainta e sesion di tratamento di ley a continua y e titular di infrastructura a bin na palabra despues di turno di su colega di labor, Minister drs. Paul Croes.

Parlamentario de Souza-Croes tabatin preguntanan tocante e integracion di trahadornan cu eventualmente lo por bin traha na e refineria. Sr. Sevinger tabata cla den su splicacion caminda a indica cu ta distingui entre trahadornan cu ta bin pa un proyecto temporal, manera ta e rehabilitacion di e compleho. E trahadornan aki ta keda pa un tempo defini y despues tin di bolbe bek na nan pais. E parti di grupo di trahador aki no ta inclui den e contexto di integracion.

E minister a sigui splica cu, no pa e refineria so, pero den su maneho regular caba, tur proyecto ta inclui un maneho pa cu integracion; tanto den procesamento di documentacion pa trahadornan temporal, como tambe den integracion di residentenan stranhero. Proyectonan den bario ta mustra esaki, por ehempel, den espacionan publico, renobacion y construccion di scolnan; tambe ta traha hunto cu embahadanan con por yuda, den clubnan deportivo, etc.

“Aruba su programa di integracion ta basa riba integracion natural, pero tambe ta bay introduci un ley caminda cu esnan cu a bin traha aki mester pasa un ‘inburgeringstoets’ of prueba di integracion dentro di 3 aña cu e persona ta na Aruba. Esey kier men cu integracion ta parti di maneho, ley y sistemanan di integracion oficial,” asina Minister Sevinger a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co