ORANJESTAD - Durante debate den Parlamento Evelyn Wever-Croes a repasa e promesanan cu Mike Eman a hasi e siman aki, cu segun lider di MEP ta parse cu campanja electoral a cuminsa pa AVP cu tipo di promesanan asina. Cu pueblo ta kere ainda, mi no sa, pero e ta sigi hasi loke e por hasi bon: priminti y ken sa si e por cumpli. Ainda pueblo ta wardando pa AVP elimina e BBO. 

"Minister Eman a yame PROSPERIDAD COMPARTI, pero mas bien ta un MACHETE contra pueblo. 7 anja largo Eman a hinca e pueblo aki cu machete di 28 medida, y awe bo kier saca e machete cu 8 punto, pero ainda bo tin e machete di mas di 20 punto den curpa di e pueblo cu ta sangrando.  
Pero mi ta contento cu sr Eman a duna MEP rason cu e no por sigi suta e pueblo aki". 

PENSIONADONAN 
Pensionadonan a experiencia aumento di prima, rebaha di pensioen cu franchise, a hisa edad di pensioen hortando nan 5 anja di pensioen cu nan a paga pe caba. Aparte di esaki a suta e pensionado cu medida: a hisa inkomstenbelasting, grondbelasting, premie AZV, mester paga pa piki sushi. Kiermeen e aumento di 25 florin pa persona soltero y 42 florin pa pareha, no ta yega ni pa paga tur e medidanan EXTRA cu Eman mes a impone riba nos pensionadonan. Ademas cu e ta pone e pensionado cai den tarifa di belasting mas halto awor cu gobierno kier aumenta e pensioen.
Pesey MESTER ELIMINA BELASTING RIBA PENSIOEN DI BIEHES

ALIVIO DI AVP NO TA SUFICIENTE
AVP a bisa cu nan a alivia e peso di belasting caba, pero ningun pensionado ta sinti esey. AVP a pidi den un mocion pa gobierno bai studia con por alivia e peso di belasting pa e pensionado, y no tin tempo pa perde, pasobra e pensionadonan ta sufriendo as we speak.
Y, ya cu placa tin, y sr Eman a confirma cu e fondo ta solido BAN AWOR PA BAHA EDAD DI PENSIOEN

STUDIANTENAN 
Mi ta contento di mira sr Eman duna MEP rason y bin cu incentivonan pa studiantenan y cu lo  hasi e pagonan di studielening aftrekbaar manera MEP a bin ta bogando pe desde januari anja pasa.  Pero no ban lubida cu e studiante ta bin bek solamente si tin trabou, y pa tin trabou mester tin un economia cresiente, locual AVP no a logra te ainda.
Bo no por comparti prosperidad cu studiantenan si no tin trabou pa nan.

BAHA TARIFA DI CORIENTE Y PIKI SUSHI
Tambe sr. Eman a priminti di lo baha tarifa di coriente  y e tarifa di piki sushi. Tur dos ta medidanan cu sr. Eman MES a bin cu nan. Esaki bo no ta yama “comparti” prosperidad, esaki bo ta yama machete cu bo a hinca cu 28 medida, y awor bo kier saca e machete cu 2 di nan bek. Pero e machete di 28 medida ta hasi hopi dolor ainda, y e sangramento tey keto bai.

DOLORNAN REAL DEN COMUNIDAD
Hopi a sinta warda pa wak si sr. Eman lo a anuncia algo pa cu dolornan real den pueblo.
CRIMINALIDAD: tur hende a pensa, ya cu tin placa, cu bo lo a compromete e 10 miyon extra pa combati criminalidad. Pa duna Cuerpo Policial fondo pa combati criminalidad, pero NADA. Pa propaganda di gobierno si, pa Polis NO.
COSTO DI BIDA haltisino. Pueblo a kere cu bo lo duna alivio, baha e peso di belasting of controla prijs, pero NADA.
SALUBRIDAD den decadencia. Pueblo a kere cu bo lo a pone mas fondo pa esey, pa cumpra material pa operacion, pa traha mas shifts den hospital pa hendenan no mester warda lunas pa hasi testnan of pa mira dokter. Pero NADA.
CUIDO DI NOS GRANDINAN  cu falta di fondo y fundacion SABA  ta suplica pa no cambia e sistema di subsidio, sino nan mester manda algun di e grandinan cas. Nan a manda gobierno carta siman pasa, pero NADA.
PROBLEMANAN SOCIAL Y DI HOBENNAN. Pueblo a kere cu lo bo a pone mas fondo disponible pa fundacionnan, pa reclassering, pero net contrario. Bo ta aproba e cambio di subsidio cu ta bai afecta e fundacionnan y ta bai crea mas pobresa. Bo sa di e problema, nan a mandabo nan carta siman pasa, pero NADA.

Pesey e promesanan di sr. Eman ta "too little, too late".

Expresionnan haci den e articulo aki no necesariamente ta refleha opinion di ArenaPoliti.co