Rudy Richardson (MEP): Nos gran pueblo lo no cay den mas traicion politico di Gabinete Eman y AVP
Tin hende den e seno di partido AVP ta kere cu e trampanan politico di FESCA di partido AVP lo por gaña nos gran pueblo den nan afan di scapa di e mal gobernacion entre 2009-2017. Nan a traha strategicamente riba un plan B pasobra plan A, esta un AVP den gobernacion ta imposibel despues cu hasta e Rey di Hulanda a manda un KB pa GE II. Sr. Eman, un dictador tras di democracia Arubano. Su gobierno a hala Parlamento unda banda dia cu el a instrui su fraccion pa vota pro e ley di CFT (Curatela) di Hulanda. E momento ey nan a bay den historia politico como e partido di traicion di nos pueblo. Contra Himno, Contra nos Bandera y Contra nos derecho di Autodeterminacion como un pueblo liber den nos Universo.
AVP-2 (Forsa Bobo) a lanta pa por minimalisa e sla politico otro aña den eleccion di 2017. AVP no ta critica ex-Minister di AVP Otmar Oduber y logico Otmar no ta critica su propio partido di 27 aña. P’esey Otmar ta pretende di ta un politico nobo y kier bay pa un cambio contra partido tradicional. Esaki ta e strategia pa bruha nos electorado muy en particular nos hubentud y swing voters (esnan sin partido). Den Parlamento, e fraccion di AVP practicamente a lembe y elogia nan ex-Minister corupto. Tur coordinador a keda traha cu e primo Coordinador cu a bira Vak Minister Richard (0 voto) Arends. Asina nos digno pueblo por wak e nivel di Mike/AVP y Otmar/AVP-2 bao capa di Forsa (Bobo) Nobo. Nos gran pueblo di Aruba lo no cay den mas traicion politico di Emanismo y contra progreso di nos humilde pueblo. E hendenaan aki cu ta burachi di poder ta kere cu nan ta doño di Aruba y ta explotando tur nos recursonan cu nan mal maneho y ta desgraciando nos futuro generacionnan. Un pacto Neoliberal pa keda na poder. Corupcion y enriqueciendo nan mes contra tur regla di bon gobernacion. Solo el pueblo, salva el pueblo.
Expresionnan haci den e articulo aki no necesariamente ta refleha opinion di ArenaPoliti.co