Durante nan biahe pa Merca pa participa na e cumbre riba energia inicia pa Vice Presidente di Merca Joe Biden, Prome Minister Eman y de Meza a haci un bihsita tambe na Columbia University. Eynan nan a papia cu e erudita, Profesor den Economia Joseph Stiglitz, kende ta duna les den economia y comercio. Stiglitz tabata tambe un consehero di e Presidente Mericano Bill Clinton y economista principal di Banco Mundial. Door di e background ey e profesor a wordo envolvi grandemente den conseha paisnan riba tereno economico.

Profesor Stiglitz a bisa cu el a haya e encuentro cu Prome Minister di Aruba uno masha interesante sigur pa loke Eman a compromete su mes na ne. “Nos a papia riba varios tereno cu mi tabata envolvi den nan. Por ehempel kico tur un economia cu ta funciona bon ta encera.” Stiglitz a bisa cu progreso social no kiermen cu bienestar ta wordo midi na ne. E no ta wordo midi manera mester ta door di GDP y pesey cu e ta contento cu Eman ta pensa riba cierto asuntonan den un contexto mas amplio. E profesor ta haya cu semper mester tene cuenta cu dos aspecto, na di prome luga percura cu e prosperidad ta wordo comparti, cu e beneficionan ta wordo comparti den sociedad y na di dos luga sostebilidad. Con percura pa e crecemento cu bo tin ta sostenibel. “E ultimo aki ta trece bek un di e preocupacionnan cu mi tin pa hopi tempo caba. Con pa tin crecemento medio ambiental sostenibel. Un aspecto particular di esaki ta energia.”

Profesor Stiglitz a bisa cu ta esencial pa tuma bentaha di naturalesa sin daña medio ambiente. E di tres topico cu el a papia cu Prome Minister Eman riba dje ta di su ultimo buki, titula ‘Creating a learning society’.  E profesor a bisa cu Eman tabata hopi interesa den e ideanan den e buki. “Con move pa crea un sociedad cu ta siñando y con Aruba por logra esaki. E hub entre Latino America, Nort America y Europa den provee conocemento, un niche den e espacio di conocemento ta un ehempel.” Aruba tin ambicionnan grandi, Stiglitz a bisa. Ta traha duro den realisa nan y den e combersacion conhunto a papia unda y con e profesor por duna su aporte.

Un tema cu a bin dilanti ta cu ora e crisis a presenta su mes na 2008, diferente pais a trata esaki den diferente forma. Tabatin un division den mundo pasobra tabatin dos filosofia economico. “Un di nan yama austeridad y e otro tabata inversion den bo hendenan y pais. Mi ta kere firme cu e politica di austeridad lo no funciona y cu e politica di inversion ta e base di crecemento sostenibel. Shete aña despues di e crisis nos ta mira e resultadonan di e dos teorianan aki. Austeridad a resulta di ta un disaster absoluto. Grecia ta un ehempel di esey. Un desempleo haltisimo y un GDP cu ta bahando mas y mas. E contraste cu paisnan cu a haci inversion manera Aruba cu a inverti den su hendenan por mira economianan fuerte na unda no tin desempleo. E debe a subi pero tin algo pa mustra cu e debe aki no a subi sin mas. Tabatin inversion den hende y den e pais. Si mira esaki for di e punto di salida aki e pais a bira mas rico y ta bayendo miho”.

Stiglitz a bisa di a keda masha contento cu Eman a scoge pa e strategia aki. El a bisa di lo bin bishita Aruba, un isla cu el a tende hopi di dje di su amigonan cu a yega di bishita Aruba.  

Joseph Eugene Stiglitz, ForMemRS, FBAta un economista Mericano  y un profesor na  Columbia University. El a ricibi e Nobel Memorial Prize den Ciencia Economico y e John Bates Clark Medal. Un persona di caliber halto.