Tanto bal nan t’ey of lag’i t’ey! 

Semper AVP a biba cu e ilusion cu ta nan so tin e solucionnan pa tur problema cu ta existi den e pais aki. Asina nan ta gaba constantemente cu nan tin dos hala ‘cientifico’, esta FESCA y Fundacion Digna Lacle-Herrera (DLH) cu ta percura pa formacion di candidatonan nobo y ta asesora gobierno di AVP den nan maneho den tur area di gobernacion. Segun AVP ta hopi rapport cientifico a ser produci caba door di e fundacionnan aki. Sinembargo e realidad ta mustra di ta completamente otro, mirando con durante e ultimo 8 añanan un gran cantidad di corupcion y bagamunderia a ser cometi den e gobernacion di Eman y cu ta muestra cu tur e rapportnan aki no bal nada pa e gobierno di AVP y cu nan por wel di wordo tira den bari di sushi. 

Finansa y Economia
Durante varios aña desde 2009 pais Aruba a wordo confronta cu deficitnan astronomico di mas di 400 miyon florin y un debe monstruoso di mas di 4 biyon florin (sin conta e debenan di PPP), te cu a yega asina leu cu Hulanda mester a interveni por medio di supervision financiero di CAFT. Pues e pregunta ta, kico tabata e rol di FESCA y Fundacion DLH pa logra cu Gabinete Eman hinca nos pais den un desaster financiero hamas bisto den nos historia?

Riba tereno economico, no tabatin practicamente ningun crecemento economico durante 2014 pa 2016 y cual siguramente ta muestra cu ambos fundacion no a aporta na net nada pa logra crea un desaroyo economico mas dinamico pa nos pais y crea cuponan di trabao duradero pa nos hendenan.

Husticia y Enseñansa
Riba tereno di husticia, nos pueblo ta bibando cu miedo panico y den inseguridad durante e ultimo 8 añanan, caminda criminalidad, ilegalidad y atraco tin henter nos pais den su gara total. Lo ta bon pa haya sa si tabata FESCA y Fundacion DLH a conseha Gabinete Eman pa elimina Warda Nos Costa, e Radarnan y e Helicopter cu tabata cuida nos costanan y cual boycott a trece cun’e un  inseguridad hamas bisto den e pais aki.

Riba tereno di enseñansa lo ta interesante pa haya sa si tabata e cientificonan di FESCA y Fundacion DLH a conseha pa elimina e construccion di e scol HAVO/VWO na Noord cu e gobierno di MEP a laga atras na 2009 y pa hinca e placa den e bendita Tram den Playa?

Infrastructura y Formacion
Riba tereno di infrastructura, e introduccion di e locura di un Tram y parkeermeters den Centro di Ciudad y cu a masacra un gran cantidad di negoshi den Caya Betico Croes, por tabata riba conseho di e cientificonan di ambos fundacion? Y e Green Corridor cu ta costa 700 miyon florin tambe tabata riba conseho di FESCA y Fundacion DLH?

Pa loke ta e formacion di candidatonan riba lista di AVP, lo ta bon pa haya sa si tabata FESCA y Fundacion DLH a percura pa crea y forma cierto parlamentarionan mediocre cu a converti Sala di Parlamento den un berguensa nacional? Y no ta e fundacionnan aki mes a crea tambe poco parlamentario mudo cu sa solamente di grita VOOR of TEGEN den Parlamento? Ki gran formacion!

Esakinan ta solamente algun punto pa demostra cu e consehonan di e cientificonan di AVP  finalmente a resulta den un desaster total pa nos pais, caminda nos finanza publico ta na werki cu un debe monstruoso cu lo keda persigui nos te aña 2040, criminalidad cu ta azotando nos pais, nos enseñansa cu a resulta den un decadencia total y parlamentarionan di AVP cu no ta digno pa representa nos pais debi na nan comportacion di shouro den Parlamento.

Expresionnan haci den e articulo aki no necesariamente ta refleha opinion di ArenaPoliti.co