"Undesastre natural hopi mas serio cu nos a pensa" 

Parlamentarionan di MEP Evelyn Wever-Croes, Xiomara Ruiz-Maduro, Dangui Oduber y Guillfred Besaril diaranson merdia a dicidi di bai mira pa nan mes e daño ocasiona pa e oil spill di fin di siman. Maske gran parti di e lama entre WEB y e rifnan ta mustra bastante limpi, por a nota varios caminda cu e zeta ta drief ainda. Pero e rifnan mes a worod seriamente afecta. Na algun di e rifnan tabata tin hendenan trahando, y por a mira e gran cantidad di hemchi y saco cu e sushi di e zeta. Na e waf na Barcadera mientras tanto tin un quimico blanco ta drief, cu parse scuma, cu probablemente ta parti di e limpiesa.

"Sinceramente, tanten bo mes no wak e desastre cu bo propio wowo, bo no ta kere cu algo asina por pasa na Aruba. Mi ta lamenta cu nos no ta prepara pa calamidadnan asina, y cu a tarda mucho hopi prome cu a tuma accion. Mi ta lamenta tambe cu WEB mes no tin 'boom' pa pone den uso mesora di un calamidad asina. Y e resultado ta cu e rifnan ta afecta seriamente. E bida marino tambe, sin conta e mangrovenan cu lo no sobrebibi.E bista banda panort di e rifnan ta un bista desastroso, y tristo. Apesar cu nos a mira algun grupo di hende ta trahando duro den limpiesa di e zeta, toch mi ta haya cu gobierno mester pone mas hende traha mesora. Mas bo warda, mas dificil e limpiesa ta bira. Dicon ta warda? Mi ta urgi ministernan encarga pa nan sali di nan oficina di airco, subi un boto mescos cu nos a hasi, y bin wak e desastre ocasiona, y asina pone ploegnan adicional pa scapa locual ainda por scapa. Mi ta urgi gobierno pa institui un equipo cu mester actua mesora den caso di calamidadnan asina, y mi ta resa pa Dios spaar nos di mas calamidad asina of peor", lider di MEP Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co