Fin di maart 2015 a cumpli dos aña cu Minister Eman a firma e Acuerdo di Diahuebs Santo cu Hulanda den cual a crea e oportunidad pa Hulanda por fia Aruba placa na interes reduci. Pa yega na remarca pa e fianza Aruba mester cumpli cu condicionnan. Den e dos añanan cu a pasa Gabinete Eman no a percura pa por cumpli cu e condicionnan cu Ministernan Eman y De Meza mes a firma pe cu Hulanda. E consecuencia ta cu Aruba no por fia na interes reduci for di Hulanda y lo mester keda paga interesnan halto pa por fia placa riba Mercado internacional.

E Acuerdo di Diahuebs Santo a wordo firma dia 28 di maart 2013, un par di luna promer cu e eleccion na september 2013. Gabinete Eman a haci un propaganda grandi cune dunando speransa na e Pueblo cu Aruba lo haya e fianzanan aki cu lo yuda baha e debe di nos Pais. Cu e Acuerdo aki nan a gana e confiansa di Pueblo bisando cu nan tin e solucion pa nos problemanan financiero y di e manera aki Gabinete Eman por a keda na poder. Pero awe dos aña a pasa y nos Pais ta pagando un suma record na interes di fianza cu ta core den 200 miyon florin. Y den tur esaki e Gobierno aki no a move un dede pa yuda drecha e situacion financiero.

Enves di drecha e situacion financiero, Gabinete Eman a fiesta cu e placa di Pueblo trahando debenan gigantesco. Nan a practica clientelismo cu placa di Pueblo hacienda favornan politico pa por keda na poder, a inverti menos di 1% di placa di presupuesto den Pueblo, a biaha pa loco, cu placa di Pueblo a organisa green conference pa companianan di afor gana placa, a favorece sponser di campania cu contracto lucrativo di huur, a firma PPP y MOU sin pensa con ta paga pa nan y a gasta miyones na propaganda pa manipula e mente di e Pueblo aki. En corto, a haci un desaster cu e finanzas publico di nos Pais. Riba dje, a logra pa IMF traha un mal rapport pa Aruba y pa Fitch y Standard & Poors downgrade nos Pais cabando cu e confiansa cu inversionista mester tin den nos Pais. Y pa caba di remata, Minister Eman a bay den welga di hamber yamando Hulanda pa verkrachter, cuasando danio na e relacion entre Aruba cu Hulanda.

Ta bisto cu Gabinete Eman a malusa e Acuerdo di Diahuebs Santo djies pa por a keda na poder y no a move un dede pa yuda Aruba sali for di e desaster financiero cu nan mes a hinca nos Pais aden. Un Gobierno cu tin e bienestar di su Pueblo berdaderamente na pecho, nunca lo a perhudica su propio Pais di e forma cu Gabinete Eman a hacie. E Acuerdo ta brinda un oportunidad di un alivio pa e cartera di Pueblo, pero Gabinete Eman no a haci nada cune pa dos aña largo.

14 april 2015

Expresionnan haci den e articulo aki no necesariamente ta refleha opinion di ArenaPoliti.co