Nos a tuma nota den prensa cu lider di fraccion di AVP ta bolbe piki piew riba opocicion y e biaha aki ta tilda MEP di kier subi BBO sin mas. Pero si nos tira bista riba e preguntanan cu e fraccion di AVP a haci riba Presupuesto 2015, nos ta tuma nota cu ta e propio parlamentarionan di AVP ta esnan cu ta boga pa subi BBO pa asina por evita un otro intervencion di Hulanda. Ta bisto cu e lider di fraccion di AVP ta spanta pa e preguntanan di su propio colega parlamentario y awor kier bruha tera tirando culpa riba MEP.

Riba pagina 3 di e Verslag cu ta contene e preguntanan di tur fraccion den Parlamento riba e Presupuesto 2015 di nos Pais, nos a tuma nota di e sigiente preguntanan di fraccion di AVP. Si no tuma e medidanan cu CFT ta propone, esaki lo significa cu Aruba lo haya un Algemene Maatregel van Rijksbestuur (AMvRB)? Si ta si, dicon no ta subi BBO? Si haya un AMvRB esaki lo significa cu gobierno lo baha? Ki funcion Parlamento lo tin e ora? Ta bale la pena pa haya un AMvRB enves di hisa BBO? Cu cual percentage mester subi BBO pa por yega mas liher posibel na un presupuesto balansa?

Ta bisto cu e parlamentario di AVP cu a haci e pregunta aki ta realisa cu e ‘move’ di AVP pa corta den BBO tabata e eror di mas grandi di Gabinete Eman. E capricho politico aki ta un di e motibonan pakiko e finanzas publico di nos Pais a bay for di man. E parlamentario di AVP ta realisa tambe cu no ta pornada IMF, Fitch, Standard & Poor’s, Raad van Advies y CFT a indica cu si BBO subi e finanzas publico di nos Pais por mehora. Y mas importante, e parlamentario di AVP ta realisa cu e capricho politico aki tambe a pone cu Hulanda a interveni na 2014 y cu awor Gabinete Eman ta bou di e menasa di un intervencion mas drastico por medio di un AMvRB.

Pesey e lider di fraccion di AVP mester stop di malinforma Pueblo cu ta MEP kier hisa BBO sin mas. Ta su mesun coleganan parlamentario di AVP ta esnan cu ta boga pa subi BBO y nan preguntanan riba Presupuesto 2015 ta sirbi Pueblo di prueba di esaki.

15 april 2015

Expresionnan haci den e articulo aki no necesariamente ta refleha opinion di ArenaPoliti.co