Parlamentario Rene Herdé tocante financiamento di partido politico
Pa hopi aña pueblo ta scucha politico di tur partido papia di introduccion di un ley di financiamento di partido politico. Por lo menos for di añanan 90 ta wordo papia di dje, y hasta concepto lo a bay Raad van Advies den pasado. Pero te ainda Aruba ta e unico pais den reino Hulandes cu no tin un ley di financiamento di partido politico.
Durante un combersacion* cu sr. Herdé tocante e tema aki, e parlamentario ta bisa cu “e mester tawata cla caba”. E lo ta cla pa 2017? “Nos ta spera...”. ArenaPoliti.co a remarca cu, mientras tur partido den nan programa ta menciona di kier pa bin un ley di financiamento, AVP, cu 13 parlamentario, tin e poder pa realisa esaki. Sr. Herdé: “...nos por pase, pero bo kier pa e wordo carga door di tur hende.”
Dos modelo
E lider di fraccion ta splica cu den fraccion AVP tin un discusion tocante dos diferente modelo pa un ley di financiamento di partido politico:
- E prome modelo ta mas den liña di loke mayoria hende ta spera, cu ta un ley cu ta haci mas cla posibel di unda e placa cu partidonan ta haya ta bin, y unda e ta bay (con partidonan ta gasta e placa). Asina e informacion ey por yega na pueblo.
- E di dos modelo, cu segun sr. Herdé un grupo grandi den fraccion AVP ta sostene, ta pa laga partidonan wordo financia door di estado (pais Aruba). Como ehempel di paisnan cu tin un sistema asina e ta menciona Hulanda, Colombia, Mexico y mas pais Europeo.
Sr. Herdé ta añadi: “Mi argumento principal pa financiamento di partido politico, no ta pa, ‘si e supermarket ey a dunami 10.000 Florin pa mi cumpra t-shirt’, [pero] pa mi ta sigur cu no tin placa sushi, di onderwereld, ta drenta partidonan y haya influencia. Cu tin placa cu ta bini di pafo di Aruba, cu bo'n sa ni unda e origen ta.”
“Ta un problema pa bo haya suficiente placa”
Segun e parlamentario, AVP ta un partido cu ta basta bon organisa. “Ainda tin cos pa drecha, ainda tin biaha bo ta ripara e partido ta manera den un dip, como organisacion… pero nos ta basta bon organisa. P’esey nos no tin problema cu transparencia di finansas... nos a regl’e bon.” Sr. Herdé ta sigui: “Pero financiamento pa campaña, incluso pa nos, ta un problema pa bo haya suficiente placa.” ArenaPoliti.co a remarca cu, aunke cu sr. Herdé ta bisa cu ta un problema pa AVP haya suficiente placa, tawata obvio cu AVP tawata tin e campaña mas costoso na 2013. “Pasobra nos a haci hopi actividadnan [fundraising]” sr. Herdé ta contesta. “Nos tin un serie di como 7 of 8 actividad di fundraising grandi pa aña.” Como ehempel e ta menciona e Lime ‘n Green event na San Nicolas. E ta sigui elabora bisando cu esey ta durante añanan normal, no añanan di campaña. “Den un verkiezingsjaar bo ta haci hopi otro cos.”
AVP tin un paar di financiado di campaña (sponsor) hopi grandi?
Sr. Herdé, pensando, ta contesta “hmmm nnno, no vast, no vast.” E ta conta cu tin companianan cu ta sponsor tur partido politico. Por ehempel, segun sr. Herdé, na 2005 “e refineria a financia tur partido. A duna tur partido segumi 100.000 of algo asina.”
Mas ehempel cu ta wordo menciona ta financiamento door di abogadonan, hotelnan, y algun compania den comercio. Sr. Herdé tambe ta menciona cu tin hotel cu, enbes di duna placa, ta take care di e catering pa un evento di partido, of ta verhuur sala hopi barata, etc. Y segun sr. Herdé, e ta tende di otro partidonan cu “nan tambe a haya”, kiermen cu ta trata di companianan cu no ta sponsor AVP so. Sr. Herdé no ta duda cu tin companianan cu si ta sponsor un (1) partido so.
Bon organisa
“Ami ta kere e forsa serca nos [AVP] ta cu, no cu nos ta financieramente royal,...” ArenaPoliti.co ta interumpi bisando cu e impresion ey tey si. Sr. Herdé: “Pasobra nos tin un campaña bon organisa.”
Pa splica e diferencia entre e impresion cu ArenaPoliti.co a referi na dje, y e realidad segun sr. Herdé, e ta conta cu sr. Elton Lioe-A-Tjam (awo presidente di partido ABO) a haci un calculacion di cuanto AVP lo a gasta na bandera, y a yega na un suma di 1.2 miyon Florin. “E no sa con nos ta haci’e. Nos tin hopi experiencia den busca prijs hopi barata riba mercado internacional.” Segun e parlamentario, AVP ta order nan banderanan hopi adelanta prome cu eleccion. Ultimo eleccion AVP a order for di China, pa un prijs hopi abou. Segun sr. Herdé “the cheapest in the world”.
Sr. Herdé: “esey ta e voordeel di ta un tiki mas organisa. Si bo mester warda e ultimo tres lunanan, anto bo tin cu bay Miami of hasta Panama pa bay cumpra [bandera], keremi, het komt je duur te staan.”
*Mei 2015
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...