‘Otmar Oduber no kier reflexiona ariba tur locual e tawata participe di dje den e gobierno aki’ [entrevista]
Durante un entrevista cu parlamentario Xiomara Maduro (MEP) e ultimo desaroyonan den e arena politico di Aruba a bin dilanti. Un di nan ta e decision di ex-minister Otmar Oduber pa retira como minister, sali for di partido AVP y lanta un partido nobo. Sr. Oduber a papia entre otro di bin cu un politica nobo. ArenaPoliti.co a puntra sra. Maduro pa su punto di bista riba e situacion aki.
Sra. Xiomara Maduro: “Mi ta duda den su intencion real di tin un cambio. Awo Otmar ta haci mane e ta un salbador. Mane e no tin culpa di nada. Awo e ta nobo, e kier politica nobo… Hallooo! Tur e tempo ey bo tawata den AVP. Bo ta participe hunto cu nan. Bo mes a bati man. E tawata e ‘beste paard’ den AVP pa defende tur locual nan tawata haciendo.”
Segun sra. Maduro, awo sr. Oduber ta wak cua grupo di votado e por complace pa e por yega unda e kier yega. Como ehempel sra. Maduro ta menciona e young voters, cual ta un grupo cu sr. Oduber a dirigi su mes na dje relaciona cu su partido nobo.
“Tur e tempo ey bo tawata den AVP. Bo ta participe hunto cu nan. Bo mes a bati man.”
“Awo e ta sali afo, pero enbes cu e bisa e cosnan cla manera cu nan ta, awo e ta bisa ‘mi ta bay pa un cambio, mi ta bay zorg pa young voters… Pero e no kier reflexiona ariba tur locual e tawata participe di dje den e gobierno aki. Mi ta bolbe ripiti, e tawata e ‘beste paard’ eyden. E tawata esun cu ta defende cu e boca di mas grandi tur e cosnan malo cu e gobierno aki tawata haci 7 aña largo. E tawata den e partido ey mi no sa cuanto aña largo y e sa tur e ‘ins and outs’ con nan ta…. Baila wowo di hende cu e ta un cambio, cu e ta un forsa nobo, siendo cu e ta e mesun forsa bieu pero hinca den un bachi nobo.”
E parlamentario di MEP ta duna ehempel pa splica den ki sentido ex-mininster Otmar Oduber tawata e ‘beste paard’ den AVP. E ta conta con tratamento di presupuesto 2017 a bay menos malo den ausencia di sr. Oduber como minister, pa motibo cu sr. Oduber no tawata t’ey pa ‘bolter e reunion y haci fastioso pa purba defende e maneho di Gabinete Mike Eman.’
“Awo cu ba haya chens di bisa pueblo e berdad, bo ta keda keto.”
Un otro motibo cu ta pone sra. Maduro duda den sr. Oduber ta cu sr. Oduber no a publica e carta cu ela duna gobernador na januari 2016. Ta trata di un carta den cual sr. Oduber a pone puntonan cu ta motibo pa e retira for di Gabinete Mike Eman II. Despues, na februari 2016, sr. Oduber a dicidi di keda forma parti di Gabinete Mike Eman II.
Segun sra. Maduro, actualmente sr. Oduber tampoco ta honesto cu pueblo riba e motibonan pa cual ela retira for di Gabinete Mike Eman II y sali for di partido AVP. “Awo cu ba haya chens di bisa pueblo e berdad, bo ta keda keto. Bo ta gewoon bin pone un bachi nobo, verf e cos blauw…. No. Ta e mesun auto bieu a keda eynan.”
Sra. Maduro ta referi na loke ela pone riba Facebook dia 22 di november relaciona cu e retiro y partido nobo di sr. Oduber:
Expresionnan haci den e articulo aki no necesariamente ta refleha opinion di ArenaPoliti.co