Perspectiva Independiente without background 001

‘Diferente vision di PPA cu otro partido ta ehecuta’ [entrevista]

Nisbet02
A pesar di no a logra haya asiento den eleccion 2013, PPA a keda activo den e arena politico. Por medio di e lider di PPA, ex-minister y ex-parlamentario sr. Benny Nisbet, e partido ta duna su punto di bista riba e maneho di gabinete Mike Eman II y riba e partidonan den Parlamento (AVP, MEP, PDR).

Na varios ocasion sr. Nisbet tambe a expresa cu diferente proyecto cu a y ta wordo ehecuta ta proyectonan cu PPA a presenta y despues a wordo ‘copia’ door di otro partido.

ArenaPoliti.co a haci sr. Nisbet e siguiente pregunta: ‘Sr. Nisbet ta profila PPA como un partido cu vision for di cual otro partidonan a ‘copia’ hopi idea. Cua ta e ideanan cu segun sr. Nisbet a wordo copia for di PPA?’

Benny Nisbet: “Si, PPA ta di opinion cu nos organisacion a proba den curso di tempo di ta un organisacion politico cu ‘vision’.  Esaki for di fundacion di PPA cu nos tabata un organisacion grandi te cu awe cu PPA no tin representacion den Parlamento!!”


‘Hub’ internacional y mudamento di containerhaven 
Sr. Nisbet ta cuminsa cu e vision di haci Aruba un ‘hub’ internacional y mudamento di e containerhaven for di Oranjestad pa Barcadera: Na prome luga e vision cu tabata e ‘curazon’ di programa cu PPA a bay eleccion cunele durante e ultimo 25 aña ta e vision pa haci ‘Aruba un HUB den Caribe’ y den cuadra di esaki e vision pa muda e containerhaven for di Oranjestad pa Barcadera. PPA tabata e unico organisacion cu tabata proyecta e vision aki…. Ningun otro organisacion politico y esaki eleccion tras di eleccion.

Ta den e cuadra aki PPA a proyecta e ‘idea’ pa muda nos ‘containerhaven’ for di Oranjestad pa Barcadera. Esaki na 1993/94. Nos a firma un protocol na 1994 cu E.C.T. (Europe Container Terminal) pa nan haci e prome estudio riba e idea aki cual tabata encera muda tanto e ‘containerhaven como nos free zone’ for di Oranjestad pa Barcadera. Ora nos a presenta e vision aki den un reunion cu un comision di Staten, (ex-)lider di fraccion/lider di AVP sr. Henny Eman a contesta nos e vision aki ta locura… e ta mucho grandi y lo costa mucho placa. Sinembargo durante e periodo cu ex-minister Robertico Croes tabata ministro el a haci un esfuerso pa presenta e ‘idea’ aki como su vision/AVP. PPA a contradeci esaki cu suficiente documento y declaracion cu AVP NO a sigui mas riba e materia aki pa hopi aña.
“Tin diferente programa di PPA cu ta proyecta tur esaki sin cu e tempo ey ningun otro partido tabata proyectele den e contexto aki!”

Ta durante e presencia di ministro Mike de Meza (ex-PPA!) AVP a dicidi di dedica atencion na e mudamento di ‘containerhaven’ for di Oranjestad pa Barcadera. Mientrastanto durante tur e añanan cu a pasa e unico partido cu tabata proyecta e vision/proyecto aki y defende su necesidad tabata partido PPA y cu a keda cuestiona diferente gobierno (MEP y AVP) con a para cu e idea aki a keda partido PPA… Tanto durante e periodo 2001-2005 cu nos tabata representa den Staten di Aruba como despues. Nos tin suficiente declaracion y documento pa proba esaki. Y ta den e cuadra di muda containerhaven for di Oranjestad pa Barcadera a dicidi di construi e infrastructura necesario e.o. e asina yama ‘vierbaansweg’ [red.: ‘Green’ Corridor] y e asina yama ‘ringweg 3’ cu awo ta wordo yama ‘Watty Vos boulevard’. Tin diferente programa di PPA cu ta proyecta tur esaki sin cu e tempo ey ningun otro partido tabata proyectele den e contexto aki!”


‘Streettrolley’ (tram) na Oranjestad
Benny Nisbet: “E unico partido cu a presenta e ‘idea’ di un ‘streettrolley/tram’ cu lo hiba turista for di nos haf pa centro di Oranjestad y bek ta PPA. AVP no tabata tin e vision/idea aki. Pero nan a didici di ehecutele… Locual nos ta lamenta si cu gobierno di AVP a para e proyecto di MAVO-HAVO-VWO pa districto di Noord su financiamento cu tabata otro vision/idea di PPA presenta como mocion den Parlamento na 2004 y cu a wordo aproba pa Parlamento cu unanimidad. Lamentablemente gobierno di MEP a tarda pa regla su financiamento entre 2005-2008 y e fondo cu a wordo laga na 2009 pa construccion di e MAVO-HAVO-VWO a wordo usa pa e vision/idea di un ‘streettrolley’.”
E unico partido cu a presenta e ‘idea’ di un ‘streettrolley/tram’ cu lo hiba turista for di nos haf pa centro di Oranjestad y bek ta PPA. AVP no tabata tin e vision/idea aki.”

Sr. Nisbet ta añadi cu PPA no ta considera cu e plan pa construi un scol MAVO-HAVO-VWO na Noord a wordo presta for di programa di PPA pasobra PPA mes a presentele como un mocion den Parlamento na 2004 cual a wordo aproba unanimamente (20 voto pro, 1 ausente).


‘San Nicolas, Our Caribbean Town’ 
Sr. Nisbet ta elabora riba e plan pa prepara San Nicolas como ‘San Nicolas, Our Caribbean town’.
“Pa hopi aña e vision aki di PPA a wordo rechasa door di varios signatura, hasta cu e ponencia… ‘Nos ta Arubiano nos no ta Caribense.’ Den e cuadra aki PPA a propone añas largo pa a construi hotel na San Nicolas… un ponencia cu a wordo rechasa y ridiculisa cu e ponencia ‘Benny is dreaming’ y ta den e cuadra aki PPA a presenta eleccion tras di eleccion un Carnaval Museum/Village… Upgrading di nos ‘watertoren’ na San Nicolas, reconstrui Nicolaas Store, drecha Uncle Louis Store, pone pinturanan riba e muraya di e refineria, drecha sitio historico, cultural na San Nicolas tur esaki den cuadra di e vision ‘San Nicolas, Our Caribbean town’.
“Pa hopi aña e vision aki di PPA a wordo rechasa door di varios signatura, hasta cu e ponencia… ‘Nos ta Arubiano nos no ta Caribense.’”

E vision y idea aki añas largo a wordo rechasa pa na prome luga partido AVP pero tambe otro partido politico. Pero poco poco a cuminsa dedica atencion na e vision di PPA primeramente cu e actividad di ‘Carubbian’ di tur diahuebs.
Nan no kier a yamele ‘Caribbean’ pasobra esey lo encera duna PPA rason, esey a conduci na yamele ‘Carubbian’. A purba construi hotel, ainda no a logra. A drecha watertoren, a drecha Nicolaas Store y awo Uncle Louis ta riba schedule di e fondo di monumento. A pinta e muraya di e futuro upgrader y diferente muraya den centro di comercio di San Nicolas. Sinembargo a maneho ‘ad hoc’ den ehecuta esaki no ta dunando San Nicolas realmente e imagen conforme di e desaroyo real cu San Nicolas a pasa’den den curso di añas…. Aki pasobra e gobierno actual no ta basa nan maneho ‘ad hoc’ riba ningun estudio y historia real di San Nicolas pero simpelmente e forsa pa haci algo prome cu eleccion bay na porta y esey no ta duna e miho resultado cu lo por wordo bendi y mercadea den futuro.”


Keda pendiente pa mas contesta di sr. Nisbet riba e plan pa haci Aruba un ‘hub’ internacional y riba ki termino e plan aki por wordo realisa, teniendo cuenta cu e situacion financiero y economico di pais Aruba.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.