Despues cu parlamentario di MEP, sra. Xiomara Maduro den un entrevista cu ArenaPoliti.co a duna su punto di bista riba e maneho economico di Gabinete Mike Eman, ArenaPoliti.co a puntra sra. Maduro con un siguiente gobierno lo mester maneha Aruba su economia. Segun Xiomara Maduro, “nos tin cu ‘reinvent’ nos mes.” Xiomara ta repasa nos pilarnan economico actual, ta elabora riba un futuro economico pa pais Aruba y ta incorpora economia den su pensamento pa cu sostenibilidad.  

Turismo
Sra. Maduro ta di opinion cu mester sigui inverti den turismo, pero cu Aruba no por sigui depende mesun hopi riba e pilar economico aki. E parlamentario di MEP tambe ta kere cu Aruba no mester sigui den direccion di purba aumenta e cantidad di turista cu ta bin Aruba. E ta wak vulnerabilidad den depende mucho riba turismo y ta considera Cuba un factor pa tene na cuenta.

Refineria
Pa loke ta trata e refineria/upgrader, sra. Maduro ta mustra di tin mixed feelings. E ta wak necesidad di e refineria/upgrader pa motibo di e realidad economico di Aruba, mientras cu e no ta completamente satisfecho cu e ‘Citgo deal.’ Xiomara: “Aruba tawata tin mester di un economic push. E refineria ta brinda esey, pero e tin su parti malo tambe. E parti mas malo ta cu ta AVP a haci e negosacion akinan. Esey t’e dolor. Dolor den e sentido cu bo sa cu ora nan negocia nunca e ta 100% pa Aruba. Semper tin algo pa nan sali bon di dje, anto Aruba ta bin na di dos luga.”

Pilar economico nobo
Sra. Maduro no ta kere den e plan di Gabinete Mike Eman pa crea un pilar economico cu e vision ‘green’ di prome minister Eman. Xiomara Maduro: “Green ta costa placa. Green no a pusha nos economia. Green a pusha economia di sponsornan di campaña [di AVP] y un paar di compania Hulandes cu na Hulanda nan no ta haya subsidio mas y nan ta bin haya subsidio di Aruba.”

“Green a pusha economia di sponsornan di campaña [di AVP] y un paar di compania Hulandes…”

Loke Xiomara si ta kere aden, ta un strategia pa diversifica nos economia basa entre otro riba diferente servicionan na Aruba pa mercado internacional. “Esey ta algo cu nos mester explora mas.” Como ehempel sra. Maduro ta referi na un plan cu lider di MEP sra. Evelyn Wever-Croes a splica ArenaPoliti.co durante un entrevista anterior. Ta trata di e plan di un ‘Arubaanse Arbitrage Instituut’ cual por crea cuponan di trabou huridico, economico y administrativo. [Klik aki pa lesa mas riba ideanan di MEP pa desaroya pilarnan economico nobo pa Aruba] 

Dialogo Nacional
Xiomara Maduro no ta duna un ‘plan total’ economico pero ta di opinion cu mester envolvi tur stakeholders pa wak exactamente den cua direccion e economia di Aruba tin cu bay. Xiomara: “Ami ta kere cu tin cu bin un ‘dialogo nacional’ pero un dialogo di berdad. No un ‘dialogo social’ mane cu Mike a haci’e djies pa por logra pasa medida sin sinti dolor. Un dialogo nacional caminda Aruba ta dicidi unda e kier bay.” Xiomara ta splica cu asina por determina metanan pa pais Aruba y trece claridad pa un y tur sa ‘unda nos ta bay.’ Xiomara ta wak e necesidad pa haci esaki no riba tereno economico so, pero tambe pa loke ta trata e autonomia di pais Aruba y e relacion den reino Hulandes.
Ademas e parlamentario ta referi na e rapport Nos Aruba 2025 y ta bisa cu ela pidi Parlamento pa crea un comision special pa por sigui e recomendacionnan den e rapport y wak cu nan ta wordo implementa, pero fraccion AVP no a bay di acuerdo.

“Sostenibilidad ta pa bo por keda na bida. Pa cuminsa bo mester bo cuminda, y di eynan bo ta sigui bay.”

“Nos mester ta sostenibel di berdad” 
Terminando su contestacion, sra. Maduro ta incorpora economia den su concepto di sostenibilidad. Segun sra. Maduro, e maneho di Gabinete Mike Eman pa loke ta trata sostenibilidad ta un farce y ta mustra mastanto como algo pa prome minister Eman pronkia cune den exterior. Xiomara Maduro: “Sostenibilidad ta pa bo por keda na bida. Pa cuminsa bo mester bo cuminda, y di eynan bo ta sigui bay.” E parlamentario ta splica un vision di sostenibilidad cu ta duna prioridad na combati pobresa y percura pa e bienestar di e pueblo. E ta considera e aspecto economico aki parti di loke mester ta ‘sostenibilidad di berdad.’

Xiomara tambe ta elabora riba agricultura, bisando cu Aruba ta depende mucho riba importacion di cuminda cual ta caro y tambe tin su riesgonan si por ehempel pa un of otro motibo barconan cu cuminda di Venezuela no ta yega Aruba. Especialmente cuminda saludabel ta mucho caro segun e parlamentario. E ta splica cu tin agricultura riba un escala mas chikito na Aruba, pero ta convenci cu Aruba por haci hopi mas riba e tereno aki.

Xiomara ta referi na e ‘Sustainable Development Goals’ di Nacionnan Uni cu tin combatimento di pobresa como prioridad #1 pa loke ta trata sostenibilidad. Energia ‘clean’ ta prioridad #7. “Anto Mike, ta riba esey so e ta concentra.”

Mas di Xiomara Maduro riba sostenibilidad na Aruba: E farce berde na Aruba no ta e sostenibilidad di berdad

*E articulo aki ta basa riba un entrevista cu a tuma luga 29 di november 2016.  

Expresionnan haci den e articulo aki no necesariamente ta refleha opinion di ArenaPoliti.co