ArenaPoliti.co a tuma contacto cu parlamentario di MEP, sr. Chris Romero, pa haya sa mas di e vision di MEP pa loke ta trata sostenibilidad. Sostenibilidad ta un concepto amplio, di cual medio ambiente ta forma parti di dje, pero cu ta encera hopi mas aspecto. E Sustainable Development Goals cu Nacionnan Uni a defini ta duna un ilustracion di diferente aspectonan cu sostenibilidad ta encera.

Sostenibilidad ta un topico hopi discuti na Aruba. Pa haya sa con e vision di MEP pa loke ta trata sostenibilidad ta diferencia di e maneho cu gabinete Mike Eman I y II (AVP) a hiba durante e ultimo casi ocho aña di gobernacion, ArenaPoliti.co a haci sr. Romero e siguiente pregunta: Si MEP logra forma e siguiente gobierno, kico MEP lo haci diferente pa loke ta trata sostenibilidad, compara cu e maneho di gabinete Mike Eman I y II? 

Sr. Romero ta cuminsa su contesta dunando su interpretacion di e significacion di sostenibilidad: “Ultimo aña sostenibilidad ta un palabra cu a wordo hopi usa y mal usa. Si bo mester haci un encuesta pa loke ta e significacion di e palabra, hopi lo bisa cu ta energia alternativo y un poco di medio ambiente. Aunke esakinan tambe ta den sostenebilidad nan ta partinan hopi chikito den esaki.”

… ora bo corta matanan cu tin hopi aña bo ta destrui esaki pa futuro generacion y ningun proyecto tin balor pa pone un deuda riba bo pueblo su cabes especialmente no pa 30 aña.”

Chris Romero: “Sostenebildidad ta e balance cu bo mester crea entre e areanan economico, social y ecologia. Es decir brinda e generacion di awe tur cos cu tin derecho riba dje pero sin daña nada pa nos futuro generacionnan pero tambe e mester keda pagabel pa tur hende. Aki ta unda nos ta diferencia di e gobierno actual ora bo corta matanan cu tin hopi aña bo ta destrui esaki pa futuro generacion y ningun proyecto tin balor pa pone un deuda riba bo pueblo su cabes especialmente no pa 30 aña.”

Energia alternativo y medio ambiente 
Chris Romero: “Lo mester traha hopi duro pa trece un balance entre e tres pilarnan di sostenibilidad pero nos mester haci lihe tempo ta contra nos. Mester desaroya mas energia alternativo? Kisas, pero no a todo costo y ni locual tin awo no ta wordo usa efectivamente. Medio ambiente mester atencion urgente pensa riba dump na Parkietenbos pero tambe tur e groen gebied cu ta wordo rosa.”

Mester desaroya mas energia alternativo? Kisas, pero no a todo costo y ni locual tin awo no ta wordo usa efectivamente.”

Pobresa y cuminda
Chris Romero: “E parti mas dificil ta e parti social, ohala cu den e proximo cuater añanan MEP lo por eradica pobersa na Aruba pero e lo ta un bataya gigantesco. Nos lo ta extremadamente orguyoso si nos por duna tur mucha algo di come nutritivo na scol si nan no por haya esaki na cas y si nos por percura cu mas [cu] 97% di muchanan ta [na] scol hayando les, paso aunke tin leerplicht e cifra aki ta wordo estima mucha mas abou. Food security ta un area den e mundo di sostenibilidad cu ta sumamente importante. Nos ta depende casi 100% di importacion pa alimenta nos isla imagina si algo mester pasa cu nos no por importa cuminda. P’esey esaki lo ta un priodidad di nos gobierno.”


Relevante: Xiomara Maduro: ‘Sostenibilidad ta cuminsa cu e bienestar di Pueblo’ [entrevista]   

Expresionnan haci den e articulo aki no necesariamente ta refleha opinion di ArenaPoliti.co