Perspectiva Independiente without background 001

E 'Top 21' di Eleccion 2013, y e desbalansa entre Parlamento y Gobierno

(Tempo pa lesa: 3 - 5 minuut)
Top6 2013
Pa eleccion 2013, minister presidente Mike Eman tawata confortablemente na prome luga como vote-getter, cu mas cu dobel di e cantidad di voto di e di dos luga. Tambe por nota cu candidatonan di AVP ta forma e top 3, y tin 6 candidato den e top 10.
Lider di MEP Evelyn Wever-Croes tin e posicion mas halto di su partido (#4). E ta wordo sigui pa Andin Bikker (PDR). E unico politiconan den e top 21 cu no ta forma parti di Gobierno of Parlamento ta sr. Booshi Wever (UPP) y sr. Rudy Lampe (RED).

Tur minister cu inicialmente a forma parti di Gabinete Mike Eman II ta den e top 21.
Apesar cu nos eleccionnan ta parlamentario, solamente 10 parlamentario actual ta aparece den e top 21. Di e 10 parlamentarionan aki, 6 ta di MEP, 3 di AVP y 1 di PDR. Mayoria di e parlamentarionan di e partido cu ta sostene Gobierno (AVP) no ta aparece den e top 30. Esaki no ta algo inusual den nos sistema electoral. Durante gobernacionnan anterior bou di diferente signatura tambe tawata tin situacionnan similar. Esaki ta un consecuencia di nos sistema electoral. Den e caso actual, cu 3 minister cu hunto a logra casi 6 asiento na voto, e chens ta bira grandi cu lo tin parlamentarionan cu relativamente tiki voto. Un consecuencia di nos sistema cu por tin un impacto negativo den e relacion cu mester tin entre Parlamento y Gobierno.

Imagen


Stempel-parlement
Parlamento ta nos organo di mas halto. Parlamentarionan tin e deber di controla Gobierno y tin e poder di baha Gobierno si nan considera esey necesario. P'esey parlamentarionan mester por eherce nan funcion independientemente di ministernan (Gobierno). Esaki tambe ta conta pa parlamentarionan cu ta sostene Gobierno. Nos sistema electoral por stroba e proceso aki.

E resultado di eleccionnan por trece cune parlamentario cu (relativamente) tiki sosten di pueblo, cu a depende grandemente riba nan partido pa logra nan puesto como parlamentario. Tambe nan futuro politico por depende grandemente riba e partido. Y ora e ministernan ta e lidernan di e partido, e situacion por bira uno den cua parlamentarionan di e partido(nan) na mando basicamente ta sigui instruccion di e ministernan enbes di controla e ministernan. E situacion aki ta trece un desbalansa den e relacion entre Gobierno y Parlamento, caminda Gobierno ta 'controla' e mayoria den Parlamento, enbes cu Parlamento ta controla Gobierno. E resultado ta un Gobierno cu poder casi absoluto, solamente limita pa Gobierno di Reino/Hulanda.

Esaki no kiermen cu cada parlamentario cu relativamente tiki voto automaticamente no ta funciona manera mester ta. E splicacion ta ilustra un possible negative side effect di nos sistema electoral, cu den practica por funciona contra e esencia di e rol di Parlamento.

Sistema alternativo
Na 2012, sr. Helmin Wiels (dfm) a bira vote-getter na Corsou cu mas cu 16.000 voto. Como lider di e partido mas grandi (Pueblo Soberano), sr. Wiels a tuma un puesto como parlamentario y no como minister. Sr. Wiels tawata tin un posicion fuerte den Parlamento cu sosten directo di riba 16.000 votado. Un situacion asina no ta comun den nos sistema electoral, y ta basa riba escogencia, no regla. Sr. Wiels a expresa cu e ta scohe pa controla su Gobierno for di Parlamento. Y como parlamentario tambe e por a instrui Gobierno den sierto sentido.

Mientras cu esaki ta trece un miho balansa entre Parlamento y Gobierno, e no necesariamente ta e deseo di Pueblo. Hopi votado kier wak e politico cu nan a vota p'e goberna como minister. Por ehempel, e 8.222 persona cu a vota pa sr. Mike Eman na 2013 probablemente tawata kier pa e ta minister presidente, no parlamentario.

Un alternativa interesante lo ta pa laga Pueblo eligi su Parlamento y Gobierno cu dos diferente eleccion (no necesariamente na e mesun momento). Un sistema asina tampoco ta perfecto, pero esaki lo por trece un miho balansa entre Parlamento y Gobierno. Ambos lo tin un sosten mayoritario directo. ArenaPoliti.co lo explora diferente sistema electoral den futuro.


Resto di Top 30:
22. Edgard Vrolijk (MEP) - 586
23. Shailini Tromp-Lee (MEP) - 573
24. Jan Hendrik Croes (MEP) - 509
25. Ady Thijsen (MEP) - 475 [parlamentario]
26. Lorna Varlack (AVP) - 474 [parlamentario]
27. Carl Giel (MEP) - 465
28. Marlon Sneek (AVP) - 441 [parlamentario]
29. Désirée Croes (AVP) - 429 [parlamentario]
30. Alvin Howell (AVP) - 422

Parlamentario pafo di Top 30:
Donny Rasmijn (AVP) - 395
Melvin Tromp (AVP) - 385
Clarisca Velasquez (AVP) - 335
Rene Herdé (AVP) - 298
Chris Dammers (AVP) - 214
Norman Roos (AVP) - 178
Jeffrey Kelly (AVP) - 97

Cantidad di asiento y voto 'directo' pa partido den Parlamento
AVP: 13 asiento -  6.325 voto 'directo' den Parlamento - 33.103 voto total
MEP:  7 asiento - 12.537 voto 'directo' den Parlamento - 17.653 voto total
PDR:  1 asiento -   3.047 voto 'directo' den Parlamento -   4.518 voto total


*E cifranan aki ta refleha e desbalansa entre Parlamento y Gobierno, en particularmente entre parlamentarionan cu ta sostene Gobierno, y e ministernan. Manera a wordo menciona caba, e motibo (principal) di esaki ta nos sistema electoral. Si Pueblo ta desea un cambio den e forma di eligi su representantenan, ta keda na Gobierno y Parlamento pa trece cambio den nos sistema electoral.

*Cantidad di voto ta basa riba un publicacion di Gobierno di resultado di Eleccion 2013
*Klik aki pa wak e vote-getters di eleccionnan di 1985 te cu 2013

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.