Perspectiva Independiente without background 001

RED: Red Democratico ta aclara e asunto di resultado electoral y matrimonio homosexual

RED01
Tanto parlamentarionan como pastornan den e ultimo dianan, a usa e resultado di eleccion 2013 di Red Democratico pa rechaza e amienda cu ta pretende corectamente di caba cu e discriminacion existente, unda un Arubiano heterosexual tin mas derecho cu un Arubiano homosexual. Parlamentarionan y pastornan ta usa ekibocadamente e derota electoral di Red Democratico, djis pa hustifica cu pa nan mester tin Arubiano di segunda categoria mescos cu den tempo di sclabitud unda catibonan Arubiano no tabata tin derecho di contrae matrimonio civil. 

Si awor pastor y parlamentarionan ta bisa cu na 2013 pueblo a rechasa Red Democratico y por lo tanto a rechasa tambe matrimonio homosexual,  esey ke men cu pueblo a rechasa tambe e lucha anticorupcion cu tabata bandera di Red Democratico na 2009 unda tambe a perde eleccion. Y esey ke men cu mester acepta pa bay contra e 10 mandamentonan, ya cu un mandamento importante ta ‘no horta’, y corupcion ke men horta placa di pueblo, y ta pueblo a dicidi toch. Ora partido AVP ta bisa di no tabata tin esaki den su programa y p’esey no por vota na fabor, mester bisa aserca cu e tram tampoco tabata den programa di AVP y toch e a keda ehecuta. Loke si tabata den nan programa ta e scol di MAVO-HAVO na Noord, cu sinembargo nunca a mira luz di dia. Bisa ‘A’ ke men bisa ‘B’ tambe, sea consecuente.

Ora ta exigi cu ley civil mester ta di acuerdo cu doctrina catolico y ta p’esey ta rechasa e areglo civil di union homosexual, dicon nunca a exigi ley civil pa declara anticonceptivo como ilegal, ya cu uso di anticonceptivo ta contra doctrina catolico. Tur esnan cu ta bati riba nan pecho cu nan ta bon catolico y ta p’esey nan ta contra matrimonio homosexual, di con nan no ta contra di uso anticonceptivo? Dicon nunca pastornan a exigi pa declara divorcio civil como ilegal, ya cu divorcio tambe ta contra doctrina cristian? Mientras tanto e gran mayoria di matrimonio na Aruba ta termina den divorcio, pero esey si no ta bay contra nos costumbernan cristian. Sea consecuente. Ora pastornan ta bisa cu Bijbel ta contra union homosexual, di con e mesun pastornan tin auto, cas y otro propiedad, mientras cu Bijbel tambe ta exigi di tur siguidor di Hesus pa bende tur propiedad y duna e placa na pobernan. Pero aki si pastornan no ta sigui e Bijbel manera e ta skirbi.

Ser consecuente den bida ta dificil. Red Democratico ta orguyoso di a defende na 2013 cu tur hende ta igual y tin mesun derecho civil. Pa 2017 Red Democratico ta bay eleccion cu e programa di ta un partido digital unda e pueblo votador lo participa directamente den cada votacion den Parlamento pa TUR topico. Nos ta enfatisa cu ta trata di tur topico, pasobra mester ta consecuente den bida. Ora nos ta bisa cu pueblo lo bay dicidi y cu e parlamentario ta un vocero di pueblo, esaki ta trata tur asunto y no solamente loke ta cumbini su interes of di su partido. Y nos lo anuncia e sistema con pa participa den cada votacion riba tur asunto, pasobra e consulta aki lo ta algo bon organisa. Finalmente, ta importante pa nos recorda cu Hesus mes a bisa cu henter e Bijbel por keda resumi den un mandamento, stima bo prohimo, y tur e dianan aki e comentarionan homofobico a demostra cu falta hopi ainda pa stima esnan oprimi y discrimina.

Directiva Red Democratico

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.