Un analisis basa riba Eleccion 2013

Mientras cu na Aruba un tiki mas cu mita di esnan cu derecho di voto ta femenino, solamente 26% di tur candidato politico ta femenino. Menos cu un cuarto di tur voto (23%) a bay pa e candidatonan femenino aki. Pa loke ta trata e averahe di voto cu cada candidato a ricibi, candidatonan masculino a ricibi un averahe di 477 voto mientras cu candidatonan femenino a ricibi un averahe di 408 voto. Solamente dos candidato femenino ta aparece den e top 10 vote-getters di eleccion 2013.

Cuatro candidato femenino a logra haya mas cu 1.000 voto. E politico femenino cu mas voto ta lider di MEP sra. Evelyn Wever-Croes (3.396 voto). E unico candidato femenino na Aruba cu a logra haya riba 4.000 voto ta e presidente di parlamento actual, sra. Marisol Lopez-Tromp, cu na aña 2001 y 2005 a logra respectivamente 4.708 y 4.392 voto, e tempo ey como miembro di MEP.

Den e gabinete cu a wordo forma a base di e resultado di eleccion 2013 (Gabinete Mike Eman II) y den Parlamento tambe tin mas representacion masculino. Solamente un (1) di e nuebe ministernan ta femenino (sra. Michelle Hooyboer-Winklaar). Mientras cu den Parlamento tin mas parlamentario masculino, e porcentahe di parlamentario femenino ta mas halto compara cu e porcentahe di candidato femenino.

AVP ta e partido cu mas hopi candidato femenino (9 di 29). MEP y PDR ambos tin 7 candidato femenino (di 29). PPA a presenta un lista di 21 candidato for di cual 6 ta femenino. RED a conta cu 3 candidato femenino (for di 10), y UPP cu 1 (for di 8 candidato).

Pa loke ta trata posicion riba lista, AVP tin 0 candidato femenino den nan top 5 puesto riba lista. MEP tin 2 candidato femenino den nan top 5 (#1 y #3). PPA tin 3 candidato femenino den nan top 5 (#2, #3, #5). PDR, UPP y RED tur tin 1 candidato den nan top 5, respectivamento candidato #4 (PDR), #3 (UPP) y #5 (RED).

Loke ta resalta ta cu e scenario politico no ta refleha nos comunidad pa loke ta trata e cantidad di representacion femenino. Esaki por tin diferente motibo. Kisas partidonan politico y votadonan ta duna e damanan den politica menos oportunidad y sosten pa participa y crece. Un otro posibilidad ta cu relativamente tiki dama tin e interes di ta un candidato, parlamentario of minister.

Lo ta ideal si mas dama participa den eleccionnan parlamentario como candidato riba un lista politico. Un miho refleho den politica di nos comunidad por tin beneficio no solamente pa e poblacion femenino, pero pa nos tur. No tin duda cu nos tin hopi dama inteligente y capas di ta bon parlamentario y minister. Damanan cu den hopi caso simplemente no a tuma e paso pa drenta politica, apesar cu nan tin e capacidad y ideanan positivo pa maneho di nos pais.

Mester remarca cu e cifranan menciona no ta nifica cu nos tin cu cuminsa vota pa candidatonan femenino paso nan ta femenino. Na mesun momento nos mester ta consciente cu Aruba tin damanan cu tin tur capacidad pa ta bon representante di pueblo. Por lo menos mesun capas cu politico masculino. No lo tarda hopi pa nos haya sa cuanto dama capacita lo tin den e ArenaPoliti.co pa e siguiente eleccion.

Expresionnan haci den e articulo aki no necesariamente ta refleha opinion di ArenaPoliti.co