Reaccion di Mike de Meza y Evelyn Wever-Croes riba rebaho di impuesto pa MEM Consultancy
Ayera 27 di mei De Telegraaf (Hulanda) a publica un articulo tocante un rebaho di Afl. 65.000,- riba un multa di belasting na 2009 pa un compania di cua sr. Mike de Meza tawata director (MEM Consultancy).
E informacion ta bin for di lider di MEP sra. Evelyn Wever-Croes, cu a base di documento di e rebaho di belasting, a haci pregunta al caso durante tratamento di presupuesto 2015. Sra. Wever-Croes a cuestiona si e rebaho tin di haber cu sr. de Meza su nombracion/posicion como minister di finansas (encarga cu departamento di impuesto). De Telegraaf ta menciona cu segun un colega/trahado di sr. de Meza, e rebaho tin di haber cu contractnan di trahadonan for di exterior cu a traha pa Valero, y cu no tin algo straño den e asunto di e 'kwijtschelding' parcial di impuesto.
E preguntanan durante tratamento di presupuesto a wordo haci na ministernan de Meza, Bermudez y Eman. Segun sra. Wever-Croes, e no a ricibi contesta for di e ministernan durante tratamento di presupuesto. Esey a pone sra. Wever-Croes manda pregunta pa ministernan de Meza y Bermudez por escrito, cu por lesa na final di e articulo aki.
Sra. Wever-Croes no a ricibi contesta riba e preguntanan por escrito (ainda), pero despues di e articulo di De Telegraaf sr. de Meza a reacciona durante un entrevista cu sr. Nelson "Speed" Andrade. Segun sr. de Meza e kwijtschelding no tin motibonan politico. Den un articulo di 24ora tambe por lesa un reaccion extenso di sr. de Meza.
ArenaPoliti.co a ricibi un grabacion di e splicacion di sr. de Meza:
Timing
Segun De Telegraaf, rebaho di e multa di impuesto lo a tuma luga despues di eleccion 2009, prome cu Gabinete Mike Eman I a wordo inaugura. E punto aki a causa hopi discusion, especialmente riba Facebook. Hopi persona ta duda si AVP lo por a 'fix' algo asina durante e ultimo simannan cu Gabinete Oduber 4 (MEP) ainda tawata na mando (demisionario). Awe, den un reaccion di sra. Wever-Croes por medio di un comunicado , e ta bisa cu e rebaho a wordo regla na momento cu sr. de Meza tawata minister caba:
"Mi a avisa e minister caba cu mi tin documento den mi poder, kiermeen miho e pensa dos biaha prome cu e ganja mi atrobe. Principalmente tocante e fecha cu el haya e rebaho, pasobra un cos mi por bisa awor: e fecha di e rebaho NO ta prome cu e la bira minister, e ta DESPUES cu ela bira minister! Hecho ta cu e minister a haya rebaho di 65 mil florin di belasting y e trato aki no ta wordo aplica riba demas companianan ni cuidadanonan. Palabra ta awor na Mike de Meza, publica documento si bo no tin nada di sconde."
E informacion di sra. Wever-Croes tocante e fecha di e rebaho ta lo contrario di loke sr. de Meza a expresa segun 24ora: "Minister Mike de Meza tabata hopi fuerte den su contesta na Evelyn Wever-Croes. El a splica cu no ta bao di gobierno di AVP, pero bao di gobierno di MEP mes su compania a haya e descuento aki y cu e ta relaciona na un areglo entre e refineria y gobierno."
Tur esaki ta laga Pueblo den un otro caso di "he said, she said", te ora cu documentonan trece claridad den e asunto aki. Si documentonan wordo poni disponibel door di sr. de Meza y/of sra. Wever-Croes, ArenaPoliti.co lo publica nan.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...