S&P Global Ratings (Standard & Poor’s) den un press release (6 juni 2016) ta informa cu basa riba expectativanan economico miho, ta cambia e perspectiva pa Aruba di ‘stabiel’ pa ‘positivo’ mientras cu ta mantene e rating di ‘BBB+/A-2’ (long- and short-term sovereign credit ratings). S&P tambe a afirma e transfer and convertibility assessment na ‘BBB+’.

Refineria
E cambio di perspectiva principalmente ta basa riba reapertura di e refineria. S&P Global: “The positive outlook reflects our view that within the next two years, there is greater than one in three likelihood that timely reopening of the refinery, in terms of investment and production, could lead to faster GDP growth than in our base case.”

Segun S&P Global, crecemento di GDP na 2015 tawata 0,1% cual ta menos cu nan a premira. Cu un reapertura di e refineria, Aruba su GDP lo por crece den forma acelera. Den combinacion cu e acuerdo fiscal entre Aruba y Hulanda (balanced budget akkoord), un reapertura di e refineria por yuda reduci e deficitnan presupuestario di Gobierno, y yuda reduci e debe di pais Aruba.

S&P Global tambe ta expresa algun preocupacion en coneccion cu CITGO y e situacion financiero di Venezuela: “We believe the possibility of CITGO being drawn into a potential Petróleos de Venezuela S.A. (PDVSA; Venezuela's state-owned oil company) bankruptcy is low, but the company's highly leveraged profile might limit its capital expenditure capacity. Moreover, we cannot rule out the possibility of PDVSA selling assets abroad, which could include CITGO, to generate additional foreign currency funding to make timely payments on its external debt. This could result in a significant delay of the planned reopening, and it's the main reason we don't include this operation in our base-case forecast.”


Deficit
S&P Global ta menciona cu e deficit presupuestario di Gobierno compara cu GDP a baha na 2015 despues di reformanan pa cu fondonan di pensioen (hisa edad di pensioen), reformanan den cuido medico (introduccion di BAZV), e balanced budget akkoord, supervicion financiero di CAft, contene gasto y colecta ingreso den un forma mas “activo”. S&P Global ta di opinion cu ehecucion exitoso di e balanced budget akkoord ta depende di implementacion di medida sugeri door di CAft (si ta necesario) y reapertura di e refineria ‘on schedule’.


Upgrade / Downgrade
Un mehoracion den e economia di Aruba lo por resulta den un upgrade den e rating di S&P Global pa Aruba dentro di e siguiente 2 aña. Na mesun momento S&P Global ta indica cu un retraso significante pa cu e reapertura lo por resulta den un cambio di e perspectiva (bek pa ‘stabiel’) dentro di e siguiente 12 luna. Retraso di e reapertura di e refineria den combinacion cu desviacion significante for di e ‘blanaced budget akkoord’ lo por resulta den un downgrade di e rating pa Aruba.


Version di Gabinete Mike Eman
Apesar cu e cambio den perspectiva ta mustra di ta basa principalmente riba e reapertura di e refineria, Gabinete Mike Eman a emiti un comunicado di prensa den cua ta duna mas credito na “e strategia financiero-economico” di Gabinete Mike Eman I y II.

Mike Eman: “Esaki naturalmente ta parti di un proceso cu nos a bisa desde comienso cu nos a acepta e responsabilidad di nos gobernacion, cu nos lo enfoca den e prome periodo di 2009 pa 2013 riba recuperacion economico di nos pais y un atencion social grandi pa esnan di menos recurso...

Na momento cu nos a drenta gobernacion tabata tin un realidad sumamente dificil caminda cu economia a cay durante e gobernacion anterior cu 15% door di ciere di refineria y e diferente medidanan cu a wordo introduci durante añanan, entre 2001 cu 2009. A perde hopi entrada tambe for di turismo, cu a cay tambe e tempo ey. Aruba a perde tambe diferente partnernan strategico, manera KLM, Carnival Cruises y American Airlines y perspectiva economico y di turismo tabata sumamente negativo. Nos a mira cu Aruba tabata tin mester di un inyeccion economico cu probablemente mester a bin for di e sector di gobierno, pasobra sector priva tabata pasando den e crisis den e momento ey...

Nos a delinea un maneho cla pa stimula e economia di Aruba, sostene esnan di menos recurso, den e periodo complica aki y semper a bisa cu nos lo cuminsa tambe di biaha, despues cu nos mira e recuperacion economico, na a trece tambe un balansa den e deficit di pais Aruba... Esaki tabata e tarea principal tambe na momento cu e di dos termino di nos gabinete a inicia y hunto cu e reformanan cu nos a introduci den e fondonan di pensioen y salud.”


Klik aki (registration required) of aki pa lesa e press release completo di S&P Global. Klik aki pa lesa e press release completo di Gabinete Mike Eman II. 

Expresionnan haci den e articulo aki no necesariamente ta refleha opinion di ArenaPoliti.co