CAft kier pa Gabinete Mike Eman duna mas splicacion riba nan proyeccion di entrada pa aña 2017     

Den un carta firma 11 di januari 2017 dirigi pa minister di finansas Angel Bermudez, CAft a duna su conseho riba presupuesto 2017 di pais Aruba.

Segun e normanan cu Gabinete Mike Eman a acorda cu Hulanda, presupuesto 2017 mester tin un deficit di no mas cu 0,5% di e producto domestico bruto.

Gabinete Mike Eman II ta proyecta diferente aumento di entrada pa gobierno. Sinembargo, CAft ta constata cu e entradanan di impuesto di pais Aruba y e saldo financiero di e sector colectivo no a wordo argumenta debidamente. Pues CAft no ta convenci cu e proyeccion di entradanan pa 2017 di Gabinete Mike Eman ta realistico. Esaki kiermen cu na e momento aki, segun CAft ta imposibel pa huzga si Gabinete Mike Eman realmente ta cumpli cu e normanan stipula den e Landsverordening Aruba tijdelijk financieel toezicht (LAft), considerando cu si e entradanan real resulta di ta menos, e deficit real lo ta mas halto cu loke Gabinete Mike Eman a presupuesta.

En particular, CAft ta referi na e crecemento substancial den entrada na impuesto cu ta wordo pronostica. Segun CAft, hasta si tene cuenta cu e efectonan positivo di reapertura di refineria e entradanan aki no ta mustra bon alcansabel, teniendo na cuenta pronostico di crecemento economico di Banco Central (CBA).

CAft ta menciona e declaracion di Gabinete Mike Eman II cu entradanan di loonbelasting na 2017 lo ta 15% mas cu a wordo presupuesta pa 2016, y 25% mas cu loke realmente a drenta na 2016.
CAft tambe ta referi na e declaracion di Gabinete Mike Eman II cu entradanan di BBO na 2017 lo ta 11% mas halto cu a wordo presupuesta pa aña 2016, y 33% mas halto cu realmente a drenta na 2016.

No lo ta prome biaha cu loke Gabinete Mike Eman realmente ta haya na entrada ta menos cu loke nan ta proyecta ora di entrega un presupuesto. Pa aña 2015 Gabinete Mike Eman a proyecta Afl. 264.8 miyon na entrada di loonbelasting. E realidad e resulta di ta Afl. 248.4 miyon. Pa loke ta trata entrada di BBO Gabinete Mike Eman a proyecta Afl. 99,0 miyon pa 2015. E realidad a resulta di ta Afl. 93.0 miyon.

CAft tambe kier mas splicacion tocante e impacto y riesgonan di e reapertura di e refineria/upgrader (Citgo Aruba). Por ehempel, CAft no ta kere den e proyeccion di Gabinete Mike Eman cu pa januari 2017 lo tin 1.250 cupo di trabou (directo y indirecto) na Citgo cu un salario average di Afl. 50.568,-. Pues segun CAft e entradanan di impuesto adicional basa riba e cuponan di trabou aki lo resulta di ta menos cu Gabiente Mike Eman ta proyecta.

Klik aki pa download e conseho completo.

Expresionnan haci den e articulo aki no necesariamente ta refleha opinion di ArenaPoliti.co