Cu atencion y, mas ainda, cu preocupacion, partido UPP ta siguiendo e acontecimento den Reino pa loke ta concerni nos autonomia. UPP ya for di basta tempo a bin ta mustra con poco poco nos mes ta bezig ta cabando cu nos Status Aparte, esta nos autonomia.

Nos a bin ta mustra, ya caba for di oposicion durante Tripartitenan na Hulanda na 2009, cu constantemente AVP, lidera door di Mike E., tabata hunga su rol di traidor dor di ta heul cu e Hulandesnan pa asina trata na desbarata tanto Parlamento como nos gobernantenan di e tempo ey.
Na momento cu Mike E. a bira Prome Ministro, el a invita WODC pa bin haci investigacion riba e gobierno saliente di 2009, y asina duna e gobierno Hulandes e oportunidad di bin Aruba cana rond y mira den nos cushina.
Mike E. kier a traha trampa pa otro, y sin sa a cay den su mesun trampa, pasobra - ciega pa poder y rencor - e no a wak e peliger directamente cu esaki lo a nifica pa su mesun gobierno despues.
Gobierno Hulandes na su turno a sinti cu e tin un “marioneta” na poder, y di e forma aki, na caminda pa 10-10-10, a purba tur manera pa caba cu e autonomia di Aruba y cu ayudo di Mike E. tambe tuma medida contra gobierno di Corsou na 2012.

Den un comunicado di 11 di november 2014 UPP a mustra caba e diferente facetanan di e traicion cu Mike E. y su gobierno a bin ta comete.
Asina nos a mustra cu riba dia 15 di juli 2011, minister Donner ta expone e vision di e gobierno Hulandes pa cu e Islanan den Caribe, y ta alerta Mike E. cu Aruba mester bay adapta un cambio den maneho: “Zoals gesteld, zijn een duurzame politiek en bestuurlijke wil en bereidheid om te voldoen aan de randvoorwaarden, basisvereisten voor een vruchtbare samenwerking. Bestendige overheidsfinanciën, een stabiele economie en rechtszekerheid zijn daarvoor bij uitstek van belang. Aansluiting van Aruba (op onderdelen) en het verder ontwikkelen en daadwerkelijk tot uitvoering brengen van deze wetten, zijn op de korte termijn cruciaal om tot samenwerking te komen".

Despues nos ta haya riba 26 september 2011 presentacion oficialmente di e “WODC-rapport” riba peticion di Mike E., unda a ser puntra pa evalua “de staat van bestuur van Aruba, een onderzoek naar de deugdelijkheid van bestuur en rechtshandshaving”.
Ni un luna despues, riba 27 di october 2011, Mike E. a firma un “Samenwerkingsprotocol” cu Hulanda pa por a fia placa riba mercado internacional. Mike E. a laga registra cu gobierno lo presenta un “meerjarig financieel kader 2010- 2016” na Parlamento di Aruba.
Mientras cu riba 29 di october 2012 minister Spies ta declara den Tweede Kamer cu a palabra medidanan fuerte cu Aruba lo mester bay tuma, aki na Aruba ta sigui hunga mooi weer ya cu tin un eleccion na caminda na 2013.
Asina mes, riba 28 di maart 2013 Mike E. y su ministro di finanzas di e tempo ey, Mike de M. ta firma e famoso “Witte donderdag akkoord”, na unda a palabra cu lo permiti investigacion di e situacion financiero door di IMF,
Fitch y S&P, y lo tene debido cuenta cu control door di RvA, CBA y ARA.

Varios di e resultadonan di e investigacion aki a wordo hala un banda, y a haci comosifuera na Aruba no tin problema.
Na momento cu gobierno ta sinta atrobe na 2013, minister JDY a profila su mes como e "Hulk" cu sí lo percura pa balansa e budget, mientras internamente a coopera, probablemente sin cu e mes sa, na entrega di nos autonomia.
E historia desde januari 2014 ta conoci, y a culmina den firmamento di e protocol di 3 di juli 2014 door di Mike E.,
na unda oficialmente a haci entrega di nos autonomia financiero, a colga su mesun colega JDY, y despues bay den un welga di hamber, poniendo cara di nos pais na berguensa.
E ultimo traicion UPP ta considera e protocol di 2 di mei 2015, na unda a otorga Hulanda e dominio completo di e gobierno y parlamento di Aruba, mientras a anuncia cu lo no permiti pa touch ni un millimeter di nos autonomia.

UPP na varios ocasion a mustra riba e peliger di desaroyonan cu nos ta wordo hinca aden. Nos a mustra riba “who is fooling who”, unda despues di tur e comedia, tambe esun di april ultimo cu Minister Plasterk, Mike E. ta cuchi cuchi cu e gobernantenan Hulandes.
Tambe awor ta resulta cu no CDA mas, sino D66 por medio di e aliado di AVP Laurent Jan Brinkhorst, un prominente di D66 y tata di Prinses Laurentien, ta esun cu ta haci diferente lobby pa Mike E., y ta tambe esun cu ta bin cu e idea di UPG. Un idea cu nos a comprende cu durante di e IPKO cu ta tumando lugar, a wordo proponi dor di D66 pa wordo atendi como punto di discusion na un siguiente IPKO. Probablemente asina Hulanda lo kier hinca e Islanan den stoma di Europa y laba su man, pasobra no a logra ehecuta e plan pa crea un "Mancomunidad” (Gemenebest).

Di otro banda UPP ta wak cu preocupacion e leunmente demasiado na Parlamentario di Tweede Kamer Bosman.
Nos ta di opinion cu Bosman NO tin nos bienestar na pecho, pero mas bien kier trata di evita cu e tutu financiero na Aruba, lo bay costa e pagador di belasting hulandes ni un cen preto.
Si nos kere cu dor di leun na su banda, esaki lo por conduci cu e gobierno actual di Mike E. ta bay y asina haya chens di sinta den e stoel di gobernacion, nos lo ta bon ekiboca. Masbien esaki lo habri caminda pa VVD tambe pensa den direccion di UPG, mirando cu nos ta bira “meer last dan lust”.

Mester compronde cu e tactica di coba un buraco pa otro lo resulta eventualmente cu bo mes lo cay den dje, manera a sosode cu Mike cu su WODC.
E consecuencia di e mentalidad di “quitate tu, pa’ ponerme yo”, lo resulta fatal atrobe pa Aruba, cu na final di cuenta ta bay perde su autonomia y su Status Aparte, loke Betico Croes e.f.m. a lucha p’e.
UPP ta di opinion cu loke Mike E. ta bezig cu ne, ta pa caba cu logro di nos gran luchador Arubiano, hincando Aruba den debe, pa despues bay bende Aruba barata cu Hulanda p.e. dor di acepta un UPG, mientras cu Hulanda lo yuda Aruba financieramente.
Di e manera aki, manera a bira custumber, bende e pueblo atrobe como un gran logro di Mike E.
Por fin e lo por haya su Statua na pleinchi Ensure.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 28, 2015

Expresionnan haci den e articulo aki no necesariamente ta refleha opinion di ArenaPoliti.co