MEP no ta sostene e amienda di parlamentario de Sousa-Croes pa introduccion di union civil (geregistreerd partnerschap). E posicion aki a conduci na e siguiente pregunta di ArenaPoliti.co na e lider di MEP: Ki alternativa MEP tin pa ofrece e comunidad LGBT, y riba ki termino?
Sra. Evelyn Wever-Croes a cuminsa splicando pakico MEP no ta sostene e amienda.

Procedura incorecto
Sra. Wever-Croes: “Pa diferente motibo nos no por sostene e amienda debi cu e procedura cu e parlamentario a encamina no ta corecto. Un ley di e embargadura aki mester cana e procedura di un ley y no amienda. Preferible un ley cu Gobierno ta prepara mirando e embergadura, y mirando e sosten amplio cu mester busca pa esaki den comunidad.”

Si e ministernan no kier prepara un ley...
“Si Gobierno no kier atende cu e tema aki, cual ami personalmente ta kere ta un eror, e por ta un ley di iniciativa di un parlamentario, pero no un amienda. E ley mester cana su caminda di consulta cu tur esnan envolvi, y mester busca consehonan di institutonan di conseho di Gobierno y Parlamento. Por ehempel, conseho di SVB kico mester wordo hasi, si parehanan den union civil tambe haya derecho riba pensioen, pasobra e fondo di SVB no ta hopi estable. Mester tin un bista cla con por regla un union civil, y kico tur ta e consecuencianan.”

Referiendo na un articulo cu ArenaPoliti.co a publica den cua sra. de Sousa-Croes y sr. Rudy Lampe a reacciona riba diferente argumento contra e amienda, sra. Wever-Croes a bisa: “Tin hende, manera sra. Desiree Croes y sr. Rudy Lampe cu ta haya cu esaki NO ta un argumento valido. Mi ta respeta opinion di tur hende, pero respeta nos trabou tambe. Nos ta parlamentario y legislador, y si nos no observa e reglanan formal pa traha ley, nos ta neglishando nos responsabilidad.”

Alternativa
Evelyn Wever-Croes: “Locual nos ta propone, y nos ta urgi Gobierno pa tuma rienda, studia e materia, y bin cu proposicionnan na Parlamento despues di consulta y despues di busca sosten mas amplio posibel.”

E lider di MEP kier enfatisa lo siguiente: “Den combersacion cu miembronan di LGBT community, mi a sinti un inquietud grandi, cu mester wordo atendi, pasobra nan tambe tin derecho mescos cu tur cuidadano na Aruba, nan tambe merece di ta bon cuida, di tin un bon biba, y di ta felis. Los di e discusion tocante matrimonio entre personanan di mesun sexo, of union civil, tin algun aspecto cu mester haya atencion AWOR, pasobra ta trata di cuido di e pareha, si algo pasa un, riba e siguiente terenonan:

• Herencia: cu e partner wordo reconosi como heredero;
• Pensioen: cu e partner por haya pensioen di viudo si e otro fayese (pensioen priva y SVB);
• Protocol hospital: si un ta malo, e areglo cu e partner ta esun cu por tuma decision pe; 
• Alimentacion despues di separacion, pa e pareha cu no tin trabou no keda totalmente desampara. 

Mirando cu aki na Aruba no a tuma luga ainda un discussion profundo riba e tema aki y no a studia tur e consequencianan, pero mes momento e inquietudnan aki cu ta biba den nos comunidad, nos ta di opinion cu riba termino corto mester traha riba e inquietudnan menciona akiriba, pa studia con por elimina e inquietudnan.”

Terminando, e lider di MEP ta mustra riba e hecho cu MEP ta den oposicion y no por realisa loke nan ta propone sin sosten di AVP. Evelyn Wever-Croes: “E alternativanan cu nos ta propone lamentablemente no ta den nos man pa wordo ehecuta. Nos por pone nan den mocion of den amienda, pero fraccion di AVP casi nunca ta bai di acuerdo cu nos mocion of amiendanan. Mesora cu nos entrege nan ta bisa cu ta den ‘prullebak’ e ta bay. Nan ta bisa semper cu ta nan ta manda, ta nan tin poder, y nunca ta consulta cu oposicion of busca sosten. Den e caso aki no tabata diferente. Pues lamentablemente nos no por haci nada awor pa kita e inquietudnan aki.”


ArenaPoliti.co tambe a puntra sr. Andin Bikker (PDR), sr. Booshi Wever (UPP) y sr. Marlon Sneek (AVP) ki alternativa nan ta propone, y si nan ta desea, un reaccion riba e contestanan di sra. de Sousa-Croes y sr. Rudy Lampe. Lider di UPP Booshi Wever a reacciona por medio di un comunicado. Parlamentarionan Bikker y Sneek no a reacciona.

Expresionnan haci den e articulo aki no necesariamente ta refleha opinion di ArenaPoliti.co