Perspectiva Independiente without background 001

3 proposicion pa preveni corupcion den gobernacion

170404 Booshi Evelyn Curtis
E investigacion di Ministerio Publico riba posibel corupcion, dirigi riba minister Paul Croes conhuntamente cu varios di su trahadonan, a trece hopi reaccion tanto den pueblo como den e arena politico. Entre tur e reaccionnan, ArenaPoliti.co a tuma nota di tres comunicado di prensa den cual tres politico ta ofrece posibel solucionnan pa preveni e tipo di corupcion cu minister Paul Croes ta wordo sospecha di dje.

E dia despues cu e investigacion a wordo anuncia, lidernan politico Booshi Wever (UPP) y Evelyn Wever-Croes (MEP) a reacciona cu ideanan cu, segun e lidernan politico, por preveni casonan similar na e sospecho contra Paul Croes. E plannan respectivo di e dos politiconan aki ta proposicionnan cu nan ta boga pa introduci pa basta tempo caba. Un di tres politico cu a presenta posibel solucion ta Curtis Fraser (POR), un persona cu a drenta e arena politico recientemente.

Seguidamente lo describi e proposicionnan den secuencia cu ArenaPoliti.co a ricibi e comunicadonan di prensa en cuestion. Na cabamento di e articulo tin links pa lesa cada comunicado di prensa corespondiente.
Booshi05
UPP: Good Governance
Booshi Wever ta mustra riba cuater aspecto di Good Governance (Bon Gobernacion). E prome ta transparencia. Segun sr. Wever, den e caso di un minister di labor, e minister lo mester publica cada ontheffing di e arbeidsmarkttoets cu ta wordo duna. E minister lo mester mustra ki procedura ela sigui pa yega na duna un ontheffing, cu hustificacion, argumentacion y motivacion pa su decision.

E di dos aspecto ta introduccion di un Ombudsman (defensor di pueblo). Cu e transparencia proponi, cualkier ciudadano cu ta convenci cu e minister no a actua corecto den e proceso di duna un ontheffing, por acudi na e Ombudsman y entrega un keho.

E Ombudsman na su turno mester actua mesora y exigi di e minister pa e responsabilisa su mes (accountability). Esaki ta forma e di tres aspecto.

E di cuater aspecto tin su efecto den e caso cu e minister no cumpli cu e aspecto di transparencia, pues ora pueblo no ta haya informacion relaciona cu e decisionnan di e minister. Den e caso aki sr. Wever ta wak un rol pa empleadonan publico cu ta tuma nota di loke ta pasa. Segun sr. Wever un empleado publico tambe mester por acudi na un Ombudsman pa entrega un keho. Den e proceso aki sr. Wever ta considera proteccion total pa e emleado publico indespensabel. E proteccion aki (klokkenluidersregeling) ta e di cuater aspecto di Good Governance cu UPP ta propone den e cuadro di preveni corupcion den gobernacion.
Evelyn13
MEP: Integridad
Sra. Wever Croes ta enfoca riba integridad den gobernacion. E prome punto ta introduccion di un ley di financiamento di partido politico. Pues ta trata di e proceso electoral prome cu yega na formacion di un gobierno. Segun sra. Wever-Croes e intencion ta pa “evita cu placa di baho mundo ta wordo usa pa hiba campaña electoral, manera a pasa den e ultimo campaña electoral cu hopi miyones a wordo hinca den campaña pa partido AVP di procedencia desconosi.”

E di dos punto ta screening di ministernan. Segun sra. Wever-Croes, Gabinete Mike Eman II no lo a consisti di e mesun personanan si nan mester a pasa e screening manera ta wordo haci na Hulanda. Sra. Wever-Croes: “Hecho ta cu Gobernador no ta hunga un papel crucial mas den screening di gobernantenan, y esey mester cambia.”

MEP tambe ta kere den e rol cu un Ombudsman acompaña cu un klokkenluidersregeling por hunga den casonan similar na e sospecho contra Paul Croes. E lider di MEP ta splica cu un Ombudsman por atende cu kehonan di cuidadanonan riba actuacionnan no-integro di gobernantenan mientras cu un klokkenluidersregeling na proteha esnan cu ta denuncia corupcion.

Por ultimo MEP ta insisti riba un Codigo di Conducta pa minister y parlamentario, cu mester evita cualkier impresion cu un minister ta paga fabornan politico na esnan cu a financia su campaña electoral.
CurtisFraser01
POR: Tecnologia
Sr. Fraser tambe ta kere den principionan di Bon Gobernacion y ta enfoca riba uso di tecnologia pa promove integridad, responsabilidad (accountability), y transparencia den sector publico.

Como ehempel sr. Fraser ta splica cu e proceso di dunamento di permiso mester wordo registra bou di e nomber di e empleado cu ta trata e permiso. Sr. Fraser: “Si pa un motibo of otro e peticion wordo aproba sin cu el a pasa door di tur e stapnan necesario, of si un peticion wordo nenga sin base oficial, of si tin cualkier otro accion iregular, lo e sistema por detecta e hechonan dudoso ora e ta "run su system check", un audit riba e sistema lo divulga e iregularidadnan tambe. Di e manera ey lo e empleado wordo responsabilisa riba su posibel actonan ilegal.”

E candidato di POR ta menciona sistemanan cu inteligencia artificial como un manera pa detecta posibel fraude. Peticionnan y keho di ciudadano tambe lo mester por wordo manda via un sistema na un manera automatisa y mester por sigui e proceso di e peticion y haya feedback riba kico falta. 

Curtis Fraser: “Di e manera aki usando technologia ya obtenibel, por sigura cu e Checks & Balances ta na su luga y cu nos como cuidadanonan no tin cu roga pa algo cu ta nos derecho.”

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.