Durante e tratamento di presupuesto di salubridad y nos grandinan fraccion MEP a pone enfasis riba medidanan di salubridad publico, Imsan y deporte. Parlamentario Glenbert Croes a papia riba diferente temanan di interes riba salubridad. Parlamentario Croes a declara lo siguiente: “Esaki ta e momento pa nos tuma e decision pa San Nicolas y tur distrito haya e HOSPITAL SAN NICOLAS. Pueblo ta sinti cu Gobierno ta cobrando Pueblo tur cos dobbel. No solamente den recogemento di sushi, pero Pueblo ta pagando e aumento di prima AZV y e Health Tax mientras cu ya for di e placa di belasting ya nos tabata paga tur e servicionan médico aki. Awor Gobierno ta bai cobra nos extra pa cada remedi (recept regel), na Eerste Hulp y na e Huisartes post. Riba dje Gobierno ta bahando e pakete di ‎servicio y cuido medico. Pueblo NO por mas. Minister Schwengle mester keda franco cu Pueblo y bisa Pueblo sin excuus cu grave e situacion den Salubridad Publico ta. Tambe e momento a yega pa regla e Arubig pa asina reconoce e diploma di tur e Dokternan cu a gradúa den region. Nos estudiantenan Arubiano mester di nos apoyo. Nos a mandanan studia, awor ban duna nan trabao na nan Pais.”

Lider di Fraccion Evelyn Wever-Croes a pidi e minister atencion pa e proyecto di radio terapia na Imsan. E malesa cancer ta un malesa cruel y e proyecto di Radio terapia na Imsan ta permiti patientnan di cancer pa hasi e tratamento na Aruba mes. Aparentemente e proyecto ta cla y financiamento tambe ta cla. Unico cos cu falta ta e compromiso di gobierno. Pesey sra Wever-Croes a puntra minister Schwengle kiko lo para di e proyecto aki den e realidad nobo, cu Mike Eman a firma cu Hulanda y cu e lo mester bai bin cu mas medida awor. "Mi ta spera cu e proyecto por wordo efectua si, pasobra e ta un proyecto hopi necesario".

Parlamentario Guillfred Besaril a pone enfasis riba deporte y un bida saludabel. E la declara lo siguiente ”Deporte ta mucho mas cu solamente prevencion y salud. E ta un herment importante den formacion di nos hobenan na momento di inculca norma y valornan. Ademas di esaki deporte por hunga un rol crucial pa mercadia un pais. Laga nos no lubida e impacto di por ehempel un Shurendi Martina pa Corsow y e impacto pa Aruba di por ehempel nos orguyo nacional Xander Bogaerts. Pesei mi kier Minister informa nos Kiko ta e maneho of vision specifico di Minister di deporte.

Expresionnan haci den e articulo aki no necesariamente ta refleha opinion di ArenaPoliti.co