Den Solo di Pueblo di dia 18 di september 2014 mi a declara: “Otmar Oduber IS corrupt, en faciliteert fraude en bedrog”; pues: Otmar Oduber TA corupto y ta facilita fraude y estafa!
Conforme e sentencia di Hues dia 5 di november 2014, e ponencia aki NO mester ser coregi. Lagami comenta algo riba e sentencia aki.
E sentencia den e caso cu Otmar a entama contra mi persona y contra Solo di Pueblo, no por ta mas cla! Otmar por gaña cuanto cu e kier, pues esey e ta haci semper, pero ela perde su caso y ela wordo condena pa paga e gastonan di e caso.

Lagami elabora un poco mas riba esaki: Otmar dilanti di Huez a plantea cu mi acusacion di cu e ta corupto y cu e ta facilita fraude y estafa, ta inhusto (“onrechtmatig”), ta haci daño na su credibilidad, su resto di carera (carrière), su integridad personal, y ta un violacion di su bon nomber. Otmar consecuentemente ta exigi cu mi ta rectifica mi acusacionnan, e ta demanda un indemnisacion (“schadeloosstelling”) inmediato di 5000 florin y un “dwangsom” di 1miyon florin pa dia!  Esaki tabata den wega pa Otmar: su integridad, su carera, su credibilidad, 5000 florin, y 1miyon florin pa dia!
Esey no ta nada tiki; esey ta un interes extremadamente grandi!

Otmar a keda man bashi! Ela haya “nul op request”!
Huez a rechasa e demanda di Otmar convincentemente, y na mesun momento a hasta reproche seriamente.
Corda bon: sigur cu tabatin un sentencia di Huez! NO ta manera e corant liga na AVP Diaree, of Toko Winklaar di Telearuba ta bisa, esta cu Huez no a trata e caso, of a mande pa un “bodemprocedure”.
Nada a wordo manda ningun caminda; tabatin un sentencia, Huez a dicta, y a rechasa e demanda di Otmar Oduber, y a condene pa paga e gastonan di e caso.
Claro cu Zotmar Oduber tin e derecho di bay den “hoger beroep” contra e sentencia, y claro cu e tin e derecho di inicia un “bodemprocedure”; e derecho ey tur hende tin si ela cuminza un “kort geding” y perde esaki. Hecho ta keda cu ami a acusa Otmar di ta corupto, y di ta participa den fraude y estafa; hecho ta cu mi ponencianan aki NO mester wordo rectifica, y cu nan NO a wordo considera inhusto.
Pio ainda pa Otmar ta, cu Huez a tira den su cara cu e tabatin dos aña di tempo pa contradeci y bringa mi acusacionnan continuo di corupcion y di fraude, pero cu e NO a haci esaki NUNCA! E ora ey bo no mester bini despues di dos aña, bin yora dilanti di Huez cu mi no tabatin mag di bisa locual mi a bisa, y teima y zeur pa rectificacion. Kiko bo ta bin exigi pa rectifica, si pa dos aña largo bo no a mustra cu mi no tin razon!!
“Mi no a proba nunca cu de Ruijter no tin razon, pero, sr. Huez, bo kier bise por fabor, cu e no mag bisa locual e ta bisando?”, esey ta locual Otmar Oduber a haci, di acuerdo cu e sentencia di Huez.
“Bay haci bo huiswerk, Otmar Oduber, y demostra cu de Ruijter no tin razon!”Esey ta locual e sentencia di Huez ta bisa, un sentencia cu ta pone un banda completamente e teimamento y zeurmento di Otmar riba su credibilidad, reputacion y carera.

Amigoe di dia 3 di november a publica e reaccion di Otmar Oduber: segun e huez no tabatin pura pa trata e caso den un “kort geding”, y lo e pasa pa un “bodemprocedure”.
Ki un nonsense cobarde! Nada no ta bay den un “bodemprocedure”. Huez a dicta, y e demanda di Otmar NO a wordo honra! NINGUN “dwangsom” di un miyon florin pa dia, ningun 5000 florin di indemnisacion, ningun rectificacion.
Ta hopi remarcabel cu huez hasta ta duna un opinion anticipa riba un “bodem-procedure”, y den punto 4.7 di e sentencia ta bisa cu Otmar Oduber no mag “just like that” bay asumi cu mi publicacionnan ta inhusto: “de Ruijter beschikt immers over documenten die node om uitleg vragen”.
Y esaki ta e esencia di e caso...Otmar no ta bay cuminza un “bodemprocedure”, pasobra e no por haci nada contra mi pruebanan!
Den e caso aki especialmente e carta di BancTrust di Panama di dia 28 di september 2012 ta importante; den e carta aki ta wordo confirma cu Compendium Consulting Inc. a cumpra e accionnan di Southwest Horeca Development di Tico Croes y famia.

Mi mensahe pa Mike Eman.
Despues cu e carta aki a weita luz di dia, Otmar Oduber den su defensa a bisa publicamente cu mi no por lesa Ingles, y cu den e carta di BancTrust NO ta para cu e accionnan di Southwest Horeca Development a wordo bendi cu Compendium.
Wel, mi a laga traduci e carta pa un traductor huramenta, kende a confirma cu di berdad ta poni cu e accionnan ey a wordo bendi! Otmar ta persisti cu e accionnan NO a wordo bendi, y cu esey solamente tabata e intencion.
Pues e ora ey ta un solo conclusion ta posibel; ta un caso di totaliza y desconta (“optellen en aftrekken”): Otmar Oduber, e famia di Tico Croes, Southwest Horeca Development y BancTrust aparentemente mester a conspira pa engaña y haci trampa cu gobierno di Aruba encuanto e proyecto Hard Rock Hotel, y esey tabata e motibo pakiko Zotmar Oduber a pone e stempel “GEHEIM” riba e carta! Wel, esey si ta un bunita gobierno, y un team solido di ministernan!
Pa locual ta trata e garantia di banco, ta un hecho tambe cu esaki NO ta “unconditional” ni “irrevocable”, mientras cu ademas ta un hecho cu diferente partido y/of instancia a manipula seriamente!
Kiko mester ta e unico conclusion?
OTMAR  ODUBER  MESTER  RENUNCIA!!
Y lo ta miho pa Mike Eman sake afo prome cu cosnan mas serio bay tuma lugar, y prome cu casonan penal wordo inicia.

Dos aña pasa mi a anuncia publicamente cu personalmente lo mi a bay haci tur empeño pa impedi continuacion di e proyecto fraudulento di Hard Rock Hotel. Esaki mi a logra awor despues di dos aña.
Pero ya esaki no ta bastante mas. Tabatin mucho hopi fraude den e proyecto aki, tabatin mucho hopi manipulacion door di mas partidonan, no unicamente door di Otmar Oduber, y esaki mester stop na Aruba.
Y esaki ta mi meta nobo: pone un paro na e fraude- y e manipulacionnan continuo di AVP, y e engaño continuo cu a kibra Pais Aruba totalmente.
Lo bin un final na tur esaki, cuminzando cu Otmar Oduber!

Jan de Ruiter
This email address is being protected from spambots. You need JavaScript enabled to view it.
Oranjestad, november 7, 2014

Expresionnan haci den e articulo aki no necesariamente ta refleha opinion di ArenaPoliti.co