Perspectiva Independiente without background 001

Ex-Premier Nelson Oduber: Proyecto di meternan di parkeer a ser converti den un negoshi familiar

NelOduber01
Basta aña pasa Arubus N.V. a laga haci un estudio riba meternan di parkeer den centro di ciudad y e estudio aki a ser conduci pa 2 stagiaire for di Hulanda. Na 2006/2007 ex-Ministro Marisol Lopez-Tromp a bin cu un proyecto di sra. Marion Kan cual tabata encera un sistema di meternan di parkeer. El’a presenta esaki na Conseho di Ministro di e tempo ey, esta Gabinete Oduber. E decision di gobierno tabata cu mester bin cu un concepto di contract pa yega na un acuerdo. Sinembargo no mester lubida cu tur decision di Conseho di Ministro ta ami como Prome Ministro ta firma esakinan. Mienstras tanto ex-Ministro Eddy Briesen y di cual Arubus ta cay bao di dje a tuma e decision cu si bin cu un proyecto asina, e mester ta di Arubus y for di e dia ey nunca mas a discuti riba e proyecto aki.

1400 meter di parkeer
Mi a sali for di gobierno dia 30 di oktober 2009, pues durante 3 aña largo ni un solo meter di parkeer a ser instala den centro di ciudad y awor despues di 6 aña cu Otmar Oduber ta minister , el’a core bin cu e medida di 1400 meter di parkeer y esaki conforme e rapport di CAFT. Sinembargo ainda e tal Otmar kier trata di carambola hinca Nel Oduber den su bagamunderianan, pasobra e kier goberna si, pero no kier carga responsabilidad gubernamental, ni duna cuenta y ni di ta transparente. Lo ta bon pa e tal Otmar puntra su colega di partido, sra. Marisol Lopez-Tromp con e proceso di e supuesto proyecto di meternan di parkeer a bay na 2007 y p’asina e por haya un ehempel con un gobierno mester traha pa su pueblo, esta den forma honesto, transparente y di scucha su pueblo.

Negoshi di famia
Puntra bo mes si den un economia asina chikito manera di Aruba cu poco volumen, di unda bo ta kere di saca 2 miyon florin di e meternan di parkeer? E decision di e tal Otmar no ta pa yuda organisa y ordena siguridad den trafico y centro di ciudad, pero pa ranca placa di pueblo malamente, kitando 2 miyon for di circulacion pa bay pa comercio y pa finalmente esaki bay den saco di e tal Otmar.
Hopi aña pasa Benny Sevinger a bisa cu nan a cumpra e tereno di ex-Tivoli pa construi un garashi di parkeer, pero te cu awe, net nada! Sin duda cu e placa a bay pa ‘friends, family and lovers”. Hecho ta cu den un garashi di parkeer ainda ta abo ta dicidi di haci uzo di dje y bo auto ta bon protegi, fuera di solo, ladronicia, joyriding etc.
Un gobernante mester ta loco pa kere cu e por obliga tur hende di haci uzo di e meternan di parkeer. Mester boicotia e lunatico pa e negoshi di comper, comer, primo, omo, tanchi, swa y resto di familia! E medida aki ta nr. 16 di e 24 medidanan segun e rapport di CAFT.
Por ultimo, fuera di escandalo di e negoshi familiar di meternan di parkeer, con a para cu e 4 biaha 80 miyon florin di ATA N.V. cu ta na disposicion di e tal Otmar, esta e suma di 320 miyon florin? Cuanto familiar, amiguito y lovers a cobra di e placa aki caba?

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.