Durante e Congreso 2015, sr. Marlon Werleman den su calidad di presidente di Comision Financiero di MEP – despues cu el a elabora y duna aprobacion pa e relato financiero 2014 di partido  - a duna un splicacion tambe di e forma con partido ta genera su fondonan. El’a trece padilanti cu e entradanan di partido grandemente ta bin di contribucion di miembronan y voluntarionan y a haci uso di e oportunidad pa gradici tur esnan cu te cu awe mensualmente y sagradamente ta duna nan contribucion voluntario na partido MEP. Alavez el’a haci un apelacion na tur esnan cu ta stima MEP y cu kier contribui den un forma voluntario, pa haci esaki y asina garantisa e existencia di partido MEP. Hecho ta cu MEP nunca a depende di capital grandi. MEP no kier esey tampoco, pasobra e forza financiero di partido mester sali for di pueblo. E pueblo y e miembronan ta doño di e partido aki. Y mayan ora cu MEP wordo yama pa carga responsabilidad gubernamental atrobe, e unico cu MEP ta duna cuenta na dje ta na e pueblo. Ta pesey mes sr. Marlon Werleman a haci un apelacion fuerte, si ta 5 florin of si ta 10 florin un persona kier yuda mensualmente partido, su contribuciuon ta necesario pa por sigui maneha partido MEP. No mester considera e contribucion solamente como un donacion, pero tambe como un contribucion y inversion den nos democracia, pasobra tanten cu MEP ta existi, Aruba ta salba.

Expresionnan haci den e articulo aki no necesariamente ta refleha opinion di ArenaPoliti.co