E ta conoci den boca di pueblo cu minister Benny Sevinger ta Mr real estate. Den ultimo siman a bira obvio cu tin un cantidad di escandolo cu propiedad di pueblo caminda e persona central den henter e escandolonan ta Benny Sevinger. E minister aki ta haciendo fiesta cu propiedad di pueblo, ta partiendo tereno na sponsornan y amigonan di dje, ta cambiando destinacionan pa loco pa acomoda comerciantenan y asina e la converti nos pais den un free for all.
E minister aki ta haciendo fiesta for di inicio di gabinete Mike Eman 1 y e fiesta a continua den gabinete Mike Eman 2 pero a yega momento pa pone un paro na e fiesta aki. Un hende no ta drenta politica pa enrikece su mes sino mas bien e ta drenta politica pa sirbi su pueblo.
Den pasado Benny Sevinger a yama ex minister di infrastructura Marisol Lopez Tromp pa Mrs Real Estate. Awe Mrs real estate, manera cu Benny Sevinger a yame ta sinta banda di dje den AVP y sostiendo e maneho cu a destrui nos pais. Siguendo e ultimo desaroyonan cu tin caminda cu Mrs Real estate a lanta un caso contra Mr Real Esate nos por conclui cu Mrs real esate ta lubida pero NO a pordona Benny Sevinger pa loke esaki a haci cune den pasado. Esaki ta pay back time pa e parlamentario Marisol Lopez Tromp pa Benny Sevinger.
Loke a sosode cu e boutique hotel no ta stranja nos. Un grupo inversionista a aserca Benny Sevinger y esaki a garantiza nan cu e proyecto lo sigui, sabiendo cu e lo mester bai haci un cambio di destinacion di cas pa hotel. Aki ta caminda e parlamentario Marisol Lopez Tromp a lanta caso contra e proyecto di Boutique Hotel. E problemanan den e gobierno di Mike Eman dia pa dia ta mas bisto y esaki ta muestra di un gobierno sin rumbo y gobierno cu no tin solucion pa nos pais E gobierno aki ta kedando na mando pa sirbi interes propio, pa sirbi interes di nan sponsornan y no sirbi interes di nos pueblo. Un gobierno caminda tin 2 minister cu a entrega nan retiro, un gobierno caminda un propio parlamentario ta lanta caso contra su propio minister ta senjalnan cla pa pueblo cu crisis ta asina grandi cu e gobierno aki no por keda mas.
No solamente e desaroyo di e boutique hotel ta un escandolo sino tambe e hecho cu Benny Sevinger a firma un tereno pa Roberto Rincon den apenas 2 dia di trabou. Ora a puntra Sevinger con esaki por ta posibel e la bisa cu e la ‘’google’’ Rincon riba internet y no a haya nada stranjo riba internet. Nos tin informacion cu seguridad nacional a backround check Rincon y a avisa gobierno cu DEA ta investigando Rincon desde anja 2010. Awor con por ta posibel cu Benny Sevinger ta papia un estupidez asina??
E propio hendenan rond di Sevinger no a haya tereno durante e ultimo 6 anjanan aki. Miles di famia ta wardando riba un pida tereno pa por construi un cas, pero ora bo ta pober e chance cu bo ta haya serca e gobierno aki ta hopi limita.
Den 6 anja Benny Sevinger NO a traha 1 cas social. Den 6 anja Benny Sevinger NO a duna FFCA tereno pa traha casnan social. Pueblo tin cu warda anjas pa por haya un pidi tereno pa traha un cas PERO sponsornan di campanja, amigonan di Benny Sevinger SI ta haya TERENO den 5 dia. Lesa bon, den apenas 5 dia anto tin miles di hende cu ainda NO a logra haya tereno di gobierno. Esaki ta simplemente ABUSO y inacceptabel y sigur un investigacion di ministerio publico ta na su lugar!

Expresionnan haci den e articulo aki no necesariamente ta refleha opinion di ArenaPoliti.co