MEP TA CONTESTA MARLON SNEEK: BAI HASI BO HUISWERK Y STOP DI PAPIA COI LOCO! 

Partido MEP a tuma nota di expresionnan sin pia ni cabes di parlamentario Marlon Sneek (AVP). Sneek kiermeen cu MEP ta ganja cu e salario average di cada coordinador ta 8 mil florin. Cu e expresion ey bo ta mira claramente cu Marlon Sneek NO a studia e presupuesto.
Nos ta referi e parlamentario na algun datos den e presupuesto: riba e asina yama personeelsstaat bo ta mira exactamente cuanto coordinador tin serca cada minister, y ta eynan bo ta mira cu total tin 338 persona ta traha como coordinador.
Despues bo por mira riba e documentonan di gasto di personal, cu e 338 personanan aki ta costa 32.5 miyon florin.
Ora bo dividi e dos sumanan aki, bo ta yega na un salario average di 8 mil florin pa persona.
Ta increible cu Baba Herde ta publica hopi potret den cual nan ta preparando pa e presupuesto, y despues Marlon Sneek ta expresa su mes di e forma ey.

ABUSO CONTRA HOBENNAN
E abusonan aki di parti di Gabinete Mike Eman ta trese cune cu hobennan ta birando lomba pa e partido, pasobra nan cu ta studia no por haya trabou, pero otronan sin estudio ta gana e salario barbaro ey. Ki estimulo esaki ta pa hobennan bai sigi studia, y bolbe bek nos pais?

OVERTOLLIGHEIDSPOEL
Segun e parlamentario Sneek, Mike Eman tin 114 coordinador, pero cu den nan tin hendenan cu ta den overtolligheidspoel. Pero e no ta bisa cuanto nan ta. Ademas, esnan den overtolligheidspoel ta cai bou di ministerio di finansas, y esey tambe ta para den e presupuesto. Pues parlamentario Marlon Sneek ta djis "tira un para", y ganja abiertamente. Un berguensa total.

Den hulandes tin un dicho cu ta bisa "schoenmaker blijf bij je leest", y den e caso aki Marlon Sneek, miho bo keda na 'hit and run' of bai studia e presupuesto mihor prome cu bo papia coi loco.

Expresionnan haci den e articulo aki no necesariamente ta refleha opinion di ArenaPoliti.co