Perspectiva Independiente without background 001

Eddy Ras (PDR): Ta cuestiona minister di enseñansa tocante examennan di OAA beroepsonderwijs

EddyRas02 audio
Di basta dia caba tin indicacionnan fuerte cu e aña escolar actual esta 2015 / 2016, cu varios opleiding di OAA (Openbare Avondleergangen Aruba) beroepsonderwijs no ta clausura cu nan examennan. OAA beroeponderwijs ta scol di ofishi anochi. Segun cu tin comprendi, e situacion aki tin di haber cu e examennan di e aña escolar actual y talbez pa den futuro no ta bay tuma luga.

OAA beroepsonderwijs a wordo funda 10 januari 1955. E aña aki OAA beroepsonderwijs a cumpli 61 aña di existencia, cual ta demostra cu tin demanda pa e instituto aki na Aruba. OAA ta ofrece diferente enseñansa tecnico y tambe opleiding costumière (cosedo di paña).
Alumnonan cu ta sigui un opleiding na OAA beroepsonderwijs, ta alumnonan cu:
  1. Pa un motibo of otro no a termina un enseñansa den nan hubentud, ta haya e oportunidad pa yega na un diploma di ofishi y cu por haya un trabou den sector laboral.
  2. A bin ta sigui un enseñansa den nan hubentud pero den bida laboral a bay traha den otro profesion diferente di locual cu nan a bin ta studia. OAA beroepsonderwijs ta brinda nan oportunidad pa e persona aki sigui un opleiding cu ta den nan profesion actual.
  3. Kier uza nan tempo y siña un profesion extra pa uza nan tempo liber. Tin meester in rechten, dokter, ingeniero, etc cu ta sigui un opleiding na OAA cu di nan mes kier tin conosimento riba e materia.
Si mester elemina examen, esey kiermen cu un opleiding di 1 of 2 aña ta bira un curso. Cu un curso bo no ta haya un diploma sino un certificado. E diferencia entre un diploma y certificado ta cu un diploma ta mara na schalering y un certificado no. Esey kiermen, cu un certificado no ta bay duna bo un aumento di salario. Un dunado di trabou ta reconoce diploma y no certificado. Esey ta hasi cu directamente bo ta mata e instituto cu tin demanda p’ e concientemente. Bo ta mata e instituto pa e motibo cu e gran parti di e personanan cu ta sigui un opleiding na OAA beroepsonderwijs, ta personanan cu ta atende un enseñansa pa haya un diploma y no un certificado. Nos tin un minister di enseñansa cu su funcion ta pa defende y mehora enseñansa den su totalidad. Pa es motibo e ta dificil pa mi persona kere cu e minister di enseñansa actual a tuma e decision di bay mata OAA beroepsonderwijs concientemente door di elemina examennan. Pero como cu e indicacionan ultimamente a bira cada bez mas fuerte, mi ta hasi un pregunta na e minister di enseñansa kico tin di berdad tocante e situacion di examennan di OAA beroepsonderwijs. Si indicacionan cu bin dilanti y bira cada bez mas fuerte ta berdad, esta si enrealidad cu examennan di varios opleiding no ta continua? Y si ta bay elemina examennan, abase di cua argumento ta bay elemina e examennan? Pasobra un examen ta garantisa calidad di enseñansa, manera scolnnan den dia y otro scolnan di anochi (pe. EPB, MAVO, HAVO /VWO, EPI cu nan diploma tambe ta mara na examen). Sin un examen un opleiding no tin derecho di existencia. Un examen ta mara na exigencianan cu un alumno mester domina.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.