Perspectiva Independiente without background 001

Setty Christiaans-Yarzagaray (MEP): Turismo ta conoce caida den aña 2016 y nunca a stop di experencia “Low Season”

setty02
Ta hopi alarmante pa un pais cu ta depende te ainda totalmente riba e industria di Turismo como su pilar economico pa realisa cu no ta solamente awor cu un Minister di Turismo a retira, cu Turismo ta bayendo malo pero pa basta tempo caba aunke nunca e por a admiti esaki. Semper e actual ex Minister di Turismo a purba twist rond di desaroyonan real di e industria di Turismo solamente papiando (y te ainda) e lenguahe cu pueblo kier tende. Specialmente cu pa motibo di e situacion economico di Venezuela, Aruba a registra subidanan significante cu ta mustra cu esakinan tawata como actividad Turistico siendo cu tawata tin suficiente indicacion cu e comportacion di e mercado Venezolano aki ta bin di otro influencia. Mi ta haya esaki un falta di respet pa e pueblo inteligente cu sa mihor paso e mes por pensa, lesa, busca data y analisa. Mas ainda pa e hubentud (“young professionals”) cu e ex Minster aki ta desea pa hala na su banda politicamente.

Na e momentonan aki e cantidad di stayover visitors na Aruba ta experenciando caida di 7.0% di januari te cu october di 2016 compara cu e mesun temporada aki di 2015. E mercado di Venezuela a experencia bahada di 31.4% pero tambe e mercado di Brazil cu 38.9% y Mexico cu 18.2% siendo cu no ta mucho tempo pasa cu e ex Minister a haci masha show cu vuelo inaugural pa e mercado di Mexico. Hasta por bisa cu for di e islanan ruman Corsou y Boneiro Aruba ta ricibiendo menos bishitante pa e aña 2016 compara cu 2015. Pa loke ta trata e parti di placa cu turistanan ta laga atras den economia di Aruba, no ta di awor nos ta alarmando pueblo y instancianan di esaki. Sigur e placa cu cada bishitante ta laga atras na Aruba a bin ta experencia caida desde un tempo caba y recientemente Banco Central di Aruba den su comunicado ta indica cu e cantidad di placa cu turistanan ta laga atras na Aruba, “tourism receipts”, tambe a baha compara cu 2015.

Por corda un slogan masha popular y uza pa e ex Minister aki na unda el a hasta convence su siguidornan y hendenan cu tawata traha cu ne di (segun e) un slogan cu ta refleha e realidad. E slogan tan uza pa e ex Minster aki, esta “Aruba no conoce low season mas” a hasta bira parti di su campaña pa e purba show cuanto merito e tin pa cu e industria di Turismo aki y awe lamentabelmente lo mester prueba tur hende y hasta e ex Minister aki cu nunca su slogan tawata concorda cu e situacion real di nos Turismo na Aruba. Semper Aruba a keda sinti efectonan di low season na Aruba! 
161214 Stayover and Seasonality
161214 Cruise and SeasonalityDen e dos graficonan adhunto por nota e tendencia di bishitante Stayover, Visitor Nights, Cruise Passengers y Cruise Calls di 2008 te cu 2016. Algo cu por wak hopi cla ta e tendencia di “Seasonality” di tur e indicadornan aki, cual ta solamente 4 paso y ainda tin mas cu por ilustra esaki. Cada biaha cu e tendencia ilustra door di e liñanan ta subi ta mustra un punto di high season pero cada biaha cu e liñanan aki baha ta demostra claramente cu no solamente cu esakinan ta señal di low season si no cu nunca Aruba a stop di experencia low season den Turismo!

Mas cu pretende y purba sconde tras di palabranan trendy manera e ex Minister di Turismo a haci, nos di MEP sa cu na tur pais di mundo e fenomeno di low y high season den industria di Turismo ta existi pero si, manera hopi otro pais, lo mester por maneha e industria aki na un forma mas responsabel y sigur no na e forma inefectivo con e ex Minister di Turismo aki a bin ta gasta fondonan di mercadeo. Nos di MEP tin nos plan cla y cu añanan di experencia lo sa di maneha e industria aki na un forma mas balansa y responsabel.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.