Andin Bikker (PDR): Parlamentario Andin Bikker ta sostene concepto cu esun cu tin mas voto ta prome yama como representante di Pueblo
Parlamentario mr. Andin Bikker a tuma nota cu colega Parlamentario sr. Dangui Oduber tambe kier trece un cambio den e Kiesverordening pa logra cu esnan cu aparece riba un lista y logra mas tanto voto, ta esnan prome yama pa bin na remarca pa drenta Parlamento. Ta algo cu Andin Bikker den e filosofia pa cual a funda Democracia Real na 2004 a bin ta bogando pe basta tempo caba, paso un Parlamentario segun nos Constitucion ta un representante di Pueblo. Andin Bikker a comenta cu pa varios eleccion caba e concepto aki tabata wordo poni den un acuerdo cu candididatonan cu kier aparece riba lista. E mes un tipo di acuerdo a wordo presenta pa partido MAN na Corsow den e eleccion mas reciente y na Sint Maarten e Kiesverordening ja a wordo cambia pa ancra e principio aki den nan ley. Pues e esencia di e concepto cu esun cu haya mas tanto voto ta prome yama pa bin na remarca pa bira representante di Pueblo ta biba den e paisnan Caribense di Reino Hulandes. Andin, kende ta conoci pa su expertisio di traha amienda y conceptonan di ley, ja den pasado a traha riba un pre-concepto di ley caminda basicamente ta cambia articulo 96 di e Kiesverordening di Aruba, similar na e articulo 98 di e Kiesverordening di Sint Maarten. Pues Andin ta sostene e concepto y ta haya cu semper ta sano pa delibera riba temanan cu ta mehora nos sistema electoral. Andin Bikker ta Parlamentario pa fraccion di PDR y pa eleccion venidero 2017 ta forma parti di e plataforma di union Forsa Nobo entre PDR y POR.
Expresionnan haci den e articulo aki no necesariamente ta refleha opinion di ArenaPoliti.co