Perspectiva Independiente without background 001

Evelyn Wever-Croes (MEP): MEP kier brinda Aruba un gobierno basa riba integridad

FraccionMEP39 AUDIO
INTEGRIDAD RIBA AGENDA DI IPKO ATROBE    


ORANJESTAD – Den e dianan aki parlamentonan di Aruba, Curacao, St. Maarten y Hulanda ta reuniendo na Curacao den e reunionnan IPKO. E tema “integridad” un biaha mas ta riba agenda. Aruba ta e unico pais den Reino cu no tin leynan riba e tereno aki.
“Nos di MEP no ta papia so di e tema, nos mes ta bin cu solucion. Ya desde mei 2014 a prepara un nota “INTEGRIDAD”. Integridad ta algo cu bo tin of bo no tin! Integridad ta ora bo ta hasi lo corecto, te hasta ora ningun hende ta wak. Pa nos di MEP integridad ta crucial den gobernacion, y pesey e tin un parti hopi importante den nos programa di campanja. Casonan manera Strawberry-gate, Lainda-gate, Kiko Gomez-gate, Bushiri-gate, INSURE-TO-STUDY-gate, EVA MARIA-gate, RINCON-gate, 90-MIL-BISAMI-gate, tur a trese duda serio den integridad di gobernantenan di Aruba, no solamente serca nos, sino tambe serca politiconan den Reino. Pesey MEP a presenta un plan den reunionnan di IPJO cu a wordo ricibi cu hopi entusiasmo y positivismo. Gobierno di Aruba no kier ehecute ainda, pero nos lo sigi insisti.

E plan di MEP pa crea un gobierno basa riba integridad ta basa riba algun proposicion concreto:

LEY DI FINANCIAMENTO DI PARTIDONAN POLITICO 
Nos di MEP ya pa algun anja ta bogando pa bin cu e ley di financiamento di partidonan politico, pa asina evita cu placa di baho mundo ta wordo usa pa hiba campanja electoral. Tur hende sa cu den e casonan ey baho mundo ta bin cobra fabornan bek, y ta mescla den decisionnan di gobierno. Si nos mira e ultimo campanja electoral nos sa cu ta hopi miyones a wordo hinca den campanja pa partido AVP, sin embargo ningun hende sa di unda tur e miyones nan ey a bin, en todo caso no di aki na Aruba mes. E cantidad y calidad di materialnan di campanja, e cantidad di fiesta y hasta carnaval cu a wordo organisa, tur ta lanta dudanan serio di e procedencia di e placa. Na otro paisnan den Reino esaki no ta posible, y partidonan politico mester publica fondonan cu nan haya. Esey nos mester cambia.

SCREENING DI MINISTERNAN 
Otro areglo cu nos tin cu mehora ta e forma con ta screen politiconan. Si e ministernan mester a pasa e screening manera na Hulanda of Curacao, lo e gabinete actual no ta consisti di e mesun hendenan. Hecho ta cu Gobernador no ta hunga un papel crucial mas den screening di gobernantenan, y esey mester cambia. Pasobra ta asina so nos por garantisa gobernantenan integro y evita tanto escandalo den gobernacion.

CODIGO DI CONDUCTA 
Tambe nos di MEP ta insisti pa bin cu un Codigo di Conducta pa minister y parlamentarionan pa asina evita cualquier impresion cu un minister ta paga fabornan politico na esnan cu a financia su campanja. Na Aruba nos a nota cu regularmente gobernantenan ta wordo menciona den escandalonan, un tras di otro, pa favorece amigonan. Hopi biaha e ministernan a perde e casonan den corte den cual nan ta wordo implica den casonan di corrupción, cu veredictonan di huesnan imparcial cu ta papia palabra cla: gobernantenan ta actua na forma iregular, y tanten cu Ministerio Publico ta sera wowo pa escandalonan asina, ta hopi importante pa bin cu Codigo di Conducta, pa evita cualquier duda den integridad di e gobernantenan.

OMBUDSMAN 
Otro ley cu mester bin cu urgencia ta esun di Ombudsman, pa asina tin un defensor di pueblo, pa garantisa integridad riba tur nivel. Un Ombudsman lo atende cu kehonan di cuidadanonan riba actuacion no integro di gobernantenan. E ley aki, acompanja pa uno di ‘klokkenluiders regeling’, mester brinda proteccion na esnan cu ta denuncia corrupcion den gobierno, pa nan no wordo persigi.

Esaki ta e plan di MEP cu nos a presenta desde 2014, y cu ainda no a haya atencion na Aruba mes. Nos lo bolbe subraya e necesidad grandi cu tin na nos pais pa bin cu e ley y reglanan aki. Nos ta convensi cu e plan di MEP lo garantisa integridad den gobernacion bek, y lo trese e orguyo bek den cada cuidadano di nos pais. Orguyo di tin un gobierno sin corpucion, orguyo di tin politiconan cu ta bisa loke nan ta bai hasi, y ta hasi loke nan ta bisa”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.