Perspectiva Independiente without background 001

Booshi Wever (UPP): Otro prueba cu introduccion di reglanan estricto di Good Governance ta indespensabel!

Booshi05 AUDIO

Ayera nos comunidad a wordo sacudi cu e noticia cu "inval"-nan na cas di varios ciudadanonan a tuma lugar. Un accion na unda tanto e poder hudicial como e poder ehecutivo a coopera cu otro. Y un di e casnan cu a ser bishita, ta esun di un minister. Mesora nos por a tuma nota di reaccionnan den medionan social.
Tin hende ta di hubilo y otro ta tristo. Ami sigur lo no bai goza cu dolor di ningun hende, ni tampoco bai huzga ningun hende. Sinembargo nos no por perde for di bista, cu nos di UPP a bin ta mustra na varios ocacion loke ta pasando den henter e asunto di permisiologia, incluso loke tabata pasa cu e "ontheffing" cu tabata ser duna na companianan pa trabounan, pa cual tin hopi Arubianonan disponibel cu por haci e trabou.
Nos ta contento cu porfin investigacionnan ta wordo haci y ta di spera cu e no keda na esaki so, sino e ta mustra cu tin tipo di descriminacion. Pasobra e minister concerni hamas por a haci loke e ta wordo acusa di dje sin ayudo di su colega Benny Zievinger y sin conocemento di particularmente Mike Eman.

Awor falta pa sigui pa e otro parti di e cadena, esta e otorgamento di e permiso mes. Nos a publica varios carta di "ontheffing" na unda ta aparece firma di tanto e minister cu ta wordo investiga awor, pero tambe di Benny Zievinger. Aki tambe nos a haci denuncia oficial na OM y nos a manda carta pa TUR partidonan politico, instancianan y gremionan riba e corupcion den esaki. Y nos a menciona nomber di Radhi Kan y Mario Wever. Ta di spera cu OM no laga e investigacion na e "ontheffingen" só, pero bai pa esnan cu ta "wheel & deal" den Dimas y cu den nomber y/of riba peticion y instruccion di Benny Zievinger ta fix cos pa hende. E tempo ey nos nunca a haya reaccion di ningun partido politico, probablemente nan ta pensa riba votonan di familiares di esnan cu a ser yuda pa un famia di nan haya un permiso cu si por vota.
Pues UPP ta contento cu OM a haci y ta haciendo investigacion den e asunto aki.
Pero nos lo ta di hubilo grandi dia cu partidonan politico y Pueblo realisa cu tur e casonan aki por a ser evita si e reglanan estricto di Good Governance tabata "in place"! Dia cu kita e posibilidad cu un politico por haci su mes culpabel na "machtsmisbruik", manera OM a menciona ayera, un minister lo pensa hopi bon prome cu e pensa di complace cu hende y ricibi placa pa esaki.

Y con Good Governance por logra esaki? Nos kier djies mustra riba 4 aspecto di Good Governance en general.
E prome ta TRANSPARENCIA. Pues e minister concerni mester publica tur e "ontheffingen" cu ela haci, y mustra cu e procedura cu ela sigui pa yega na e "ontheffing" ta conforme nos ley- y reglanan. Y den esaki ta importante pa e hustifica, argumenta y motiva su desicion.

Si e no haci esaki manera cu mester ta, cualkier ciudadano mesora por acudi na e OMBUDSMAN y entrega un keho. Esaki na su turno mester actua mesora y exigi di e minister concerni pa e responsabilisa (ACCOUNTABILITY) su mes loke ela haci. Pues e ciudadano no mester warda un aña pa algo por ser haci.
Den e caso cu por ehempel e minister hinca den su cabez mes cu por keda sin ta transparente, un empleado publico lo por bai cerca e mesun Ombudsman pa entrega un keho. Awor hopi ambtenaar no ta hacie pasobra e tin miedo di represaya. Ta pesey ta indespensabel pa introduci leynan cu ta duna proteccion total na e asina yama "KLOKKENLUIDERS".
Cu e 4 aspectonan aki so, nos por logra cu e minister su man ta mara y cu elo pensa su mes mil un biaha prome cu e bay haci su mes culpabel na tipo di actonan criminal asina. Aki nos kier a ilustra con facil e ta pa trece e cambionan necesario pa nos por garantisa e pueblo cu su interes ta wordo bon sirbi y proteha.

E dia cu nos por logra introduci e reglanan aki, e dia ey, SI UPP lo ta di hubilo y nos ta sigur cu e Pueblo tambe lo ta di fiesta, pasobra e Pueblo lo ta feliz, pasobra e benificio lo bai directamente pa e Pueblo, mescos ta e caso na e paisnan scandinavio cu tin e reglanan estricto di Good Governance "in place"!
Dicon ainda otro partidonan politico no kier esaki, pa UPP ta un misterio.
Ta pesey UPP ta bisa "CUBO so nos por logra, P'ABO por ta feliz y PA ARUBA por ta prospero atrobe y nos por mustra mundo henter cu nos ta merecedor di nos Status Aparte.


Partido UPP
Booshi Wever
29 di maart 2017

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.