Parlamentario mr. Juan E. Thijsen ta kere cu ta importante pa pueblo di Aruba ta consciente con e poder politiconan ta move riba nos isla y den Reino Hulandes. Desde 2009 Aruba a conoce Gabinete Mike Eman cu a cuminsa cu hopi entusiasmo y promesa. AVP a gana eleccion entre otro cu acusacionan cu Partido MEP lo a traha pa yena saco y hiba un maneho corumpi. Mike Eman a bai asina leu di laga parlamento Hulandes pa medio di WODC haci un rapport referente e acusacionan aki. Grandi tabata e decepcion pa AVP y Mike Eman cu WODC no a logra nada y ningun hende no a worde investiga ni deteni.

Segun Parlamentario mr. Juan E. Thijsen WODC si a laga hopi recomendacion atras pa e gobierno di Mike Eman bai cumpli cu ne. Despues di 8 anja di gobernacion sinembargo cu e gobernacionan di Mike Eman a resulta e pio den e historia di nos Status Aparte. Tur sorto di violacion nos a conoce di fayo den maneho, fayo den ley, fayo den principionan di bon gobernacion y den esaki corupcion a haya un rol central. E corupcion no a keda na un Ministro pero a plama den Ministernan manera un malesa contagioso. Un di e Ministernan sigur cu a resalta tabata Otmar Oduber y su fechorianan ta bon conoci cerca Mike Eman pero Mike Eman a scoge pa wanta su hendenan hunto y hasta a logra gana un eleccion mas. Sinembargo e situacion politico a cambia y Otmar na final di tempo a scoge pa bandona e barco cu ta hundiendo. Segun Parlamentario mr. Juan E. Thijsen ta worde papia hopi cu Otmar no lo wak eleccion ya cu Mike Eman lo laga investiga Otmar. Pa cu esaki tin Mike Eman parse tin varios poz hundo y stinki cu Otmar a laga atras. Ta ser menciona cu tin filenan di e projecto di Linear Park cu acusacionan serio contra Otmar di a ricibi plaka. Un otro poz cu ta ser menciona ta e hacking di Arubus. Akinan un suma basta grandi a desaparece cu despues a bin e storia e hacking di banco dor di un grupo Chinees. Aparentemente e suma di plaka a desaparece pa casualidad net un dia despues cu e edificio pa bao di Royal Plaza cu segun contract a bira propiedad di Arubus a worde bendi mesora sin ningun procedura legal di oferta publico manera ley ta prescribi. E storia cu ta core ta cu e plaka cu a desaparece a bai pa acidente riba cuenta di Arubus y lo ta suma di e deal pa e edificio. Asina tin mas acusacionan cu Mike Eman tin cla pa usa contra Otmar Oduber. Tambe ta ser menciona cu "ontheffingen" no a cuminsa cu Paul Croes sino Otmar Oduber. Parlamentario mr. Juan E. Thijsen ta kere sinembargo cu Mike nunca lo haci un keho oficial ya cu Mike Eman ta warda resultado di elecion pa usa e acusacionan contra Otmar Oduber pa forza un coalision AVP POR y asina logra prolonga un tercer Gabinete Mike Eman. Parlamentario mr. Juan E. Thijsen y partido MEP lo sigi e desaroyanan politico aki di cerca y ta pidi pueblo pa ta alerta. Parlamentario mr. Juan E. Thijsen ta kere cu Otmar Oduber mester enfrenta Mike Eman y kita tur duda cu su persona y partido ta liber di cualkier acusacion y no ta mara ni tampoco por ser chantagia pa cera un coalision AVP-POR. 

Expresionnan haci den e articulo aki no necesariamente ta refleha opinion di ArenaPoliti.co