Den cuadro di transparencia    

Diaranson merdia Fundacion Aruba Uni a haci entrega na Director di Camara di Comercio y Industria sra. Sonja Velthuizen y na Presidente di e organisacion, sr. Ernst Mohamed, e cuentanan anual di e Fundacion pa ciere di aña 2016. Tabata presente na e ocasion aki presidente di Fundacion Aruba Uni Sr. Simon Arends y Tesorera di e Fundacion Sra. Silvia Gildhorn.

Meta Fundacion 
Fundacion Aruba Uni su meta ta entre otro promove y stimula politiconan dedica na bin dilanti pa idealnan y husticia den nos sociedad. Esaki a pesar cu e lo por trece cune risiconan personal of desventahanan den cierto circuntancianan. Igualmente, e fundacion ta hunta, administra, maneha y asigna fondonan pa yuda logra e metanan stipula y pa tin fondonan pa campaña electoral den e sentido mas amplio di palabra. Cu e accion aki Fundacion Aruba Uni pa algun aña caba a sostene sr. Otmar Oduber, e partido AVP y awor POR pa cumpli cu su obhetivonan. Camara di Comerico y Industria a mustra complaciencia cu e accion aki y a subraya cu ta e prome fundacion cu e metanan aki cu ta haci entrega di su cuentanan anual.

Ehempel di transparencia 
Sr. Otmar Oduber a bisa “Mi ta sumamente orguyoso cu ta ‘walk the talk’. Den e statutonan di e partido cu nos a lanta tin poni cu nos kier transparencia pa loke ta trata e finansas di e partido y esey ta locual cu kier tambe. Den e cuadro aki a lanta Funacion Aruba Uni cu diaranson mainta a entrega e cuentanan anual di 2016 na Camara di Comercio conforme e mesun ley cu a wordo cambia y adapta di companianan cu mester entrega esaki na Camara di Comercio. Mi a haye un tremendo iniciativa pa nan tambe entrega jaarrekening 2016 como un fundacion.”

Sr. Oduber a sigui bisa cu e tabatin e honor di ricibi for di e miembronan di e bestuur di e fundacion un copia di esaki, cual diamars otro siman, durante di e rueda di prensa di POR, lo pone esaki disponibel pa cada miembro di prensa cu ta presente. Di e forma aki medionan di comunicacion tambe por tin un bista di e cuentanan anual di 2016 di Fundacion Aruba Uni. “Esaki ta un ehempel y segun mi tin entendi esaki a wordo bisa tambe pa Presidente di Camara di Comercio cu Fundacion Aruba Uni ta e prome fundacion cu ta sostene un politico aki na Aruba cu ta haci esaki. Esaki un biaha mas ta mustra e integridad,norma y balor cu kier para p’e como partido, politico y fundacion cu ta sostene un partido politico y den e caso aki un politico active”, Sr.; Oduber a indica.

“E partido a lanta na final di 2016 y e fondonan cu a wordo uza den e partido na cuminsamento a wordo subsidia en parti pa e fundacion cu ta sostenemi como candidato. E ta importante cu bo tin transparencia di con bo a ricibi bo fondonan cu a sostenebo durante 2016 como politico y aworaki na 2017 e fundacion y mi persona lo sigui opera y lo sigui habri e bukinan aki. Final di aña lo presenta un relato financiero di partido, pa tur hende mira for di unda e fondonan a bin y pa comunidad por mira con ta haci fundraising durante aña. Den e statutonan ta poni tambe cu ora cu haya un donacion cu ta surpasa e suma di 10 mil Florin, tin cu hasta haci esaki conoci na conseho di partido (partijraad) den su totalidad”. 

Terminando sr. Oduber a indica cu e ta contento cu locual a tuma luga. “Mi ta kere cu esaki ta bay ta un ehempel sigur pa tur otro fundacion, politico y partido akinan na Aruba. Ta un muestra cu no mester warda un ley bin pa actua den spirito di dje, pero ya caba por cuminsa mustra e transparencia cu tin den e aspectonan financiero di e partido.” 

Expresionnan haci den e articulo aki no necesariamente ta refleha opinion di ArenaPoliti.co