Cu orguyo ReD a presenta awe sra. Kinsasha van der Bliek como candidato nobo y tur por conose su persona diadomingo awor. Diadomingo awor 2 di juli ta tuma lugar e reunion anual di miembronan di ReD na ATIA Building di 13.00 te cu 17.00 y pa 17.00 lo tin un sorpresa pa tur cu ta presente. Tur miembro y simpatizante ta keda cordialmente invita pa asisti na e reunion. E caso den corte di PDR ta mustra con importante ta pa partidonan politico cumpli cu nan statutonan y ley di partidonan politico. Esei ta distingui ReD, tur anja nos tin nos reunion di miembronan manera nos statuten ta stipula y invitacion personal a sali pa tur miembro conform e tempo stipula pa nos statuten.

Den e reunion di diadomingo lo presenta e relato financiero di nos organizacion politico y directiva ta presenta tambe e programa politico di eleccion 2017. Pesei e no a bai online e weekend pasa manera anuncia, sino nos a warda pa presenta esaki prome na nos miembronan y mesora despues lo e ta disponibel online. Tambe lo sera conosi cu tur nos candidatonan, aunke ainda falta mas pa bin despues di 2 di juli. Pesei lo bai tin un reunion extraordinario di nos miembronan dia 30 di juli for di 13.00 te cu 17.00 unda lo presenta pa aprobacion e lista definitivo di ReD pa eleccion 2017 y na mesun momento tur candidato lo firma dilanti nos miembronan como testigo e Gentlemen's Agreement cu ta stipula cu ta esun cu mas voto lo bai Parlamento independiente di e secuencia di e lista.

Lamentablemente ReD ta bolbe bai su so cu un lista. Un biaha mas den e ultimo simannan nos a hasi nos best pa yega na un lista combina cu otro partidonan. Nos tin cu bisa cu tur partido cu nos a aserca a rechasa pa forma un lista combina cu ReD. Partidonan PPA, MAS, UPP, ABO, RAIZ y CURPA na final no a acepta nos proposicion. E deadline pa forma un lista combina tabata 22 di juni, ora cu tabata e ultimo dia pa presenta cambio den e nomber cu cua un partido ta bai eleccion, y lamentablemente nos tin cu informa pueblo cu nos no a logra a pesar di tur nos esfuerzo. Pueblo sa cu for di 2005 ReD ta purba di yega na un lista combina y te awe sin exito. For di ora cu ReD a lanta na 2003 nos tabata full conciente cu mas partido na un eleccion ke men mas chens di crea restzetel pa e partidonan tradicional. Na 2005, na 2009, na 2013 nos a pidi pueblo dispensa cu nos a hasi nos best pero nos no a logra un lista combina, cu e consecuencia cu un partido so a haya e mandato danki na e restzetels. Y na 2017 nos tin cu bolbe pidi pueblo dispensa, nos a hasi nos maximo esfuerzo, nos a bolbe tuma e initiativa y atrobe nos no a logra. Y pueblo sa cu no ta pa falta di boluntad politico di ReD.

E biaha aki toch e resultado di eleccion ta bai ta diferente, nos ta sinti tur caminda cu pueblo lo duna e sosten na ReD pa logra un gobierno di coalicion cu lo traha pa e interes general. Di antemano danki pa e confianza di e pueblo y danki na Kinsasha van der Bliek pa acepta pa sirbi pueblo via politiek.

Rudy Lampe 
Secretario di Directiva di ReD

Expresionnan haci den e articulo aki no necesariamente ta refleha opinion di ArenaPoliti.co