Oranjestad – partido CURPA como unico partido lo saca nombramento y promocion di ambtenaar for di man di minister cq ministerraad. Esaki lo caba cu e patronahe politico cu ta e causa di un aparato gubermental grandi cu nos conoce awe na unda cu mas o menos 450 Miyon florin ta bai na salario. Ningun politico tradicional lo hasi esaki y lo no lo trece esaki dilanti tampoko como solucion pa baha e gastonan di e aparato gubermental.  Actualmente un minister ta draag voor un persona pa bira un ambtenaar y conseho di minister ta formaliza esaki igualmente si ta trata un promocion of si t akita un ambtenaar. Ban ta honesto e motibo cu e partido tradicional hamas lo saca nombramento for di minister tin di haber cu e hecho cu nan compinchinan cu ta core campaña pa nan solamente ta haci esaki si nan ta haya un trabow of promocion den gobierno si nan drenta gobierno. Pesey no sta na unda nos ta. Partido CURPA lo baha e gastonan di e aparato gubermental door di 1. Baha e cantidad di minister di 9 pa maximo 7 anto hince den un ley. 2. Limita e cantidad di coordinador pa cada minister na maximo 14 esta 7 interno y 7 externo na unda e externo lo bai hunto cu e minister dia e no ta minister mas. 3. Saca nombramento y promocion di ambtenaar for di man di minister. 4. Independiza y automatiza cierto tareanan di gobierno. 5. Mantene un personeelsstop cu excepcion di maestro, husticia y trabownan cu tin scarcidad y ta rekeri un experticio. Si nos sigui e puntonan aki e gastonan di e aparato gubermental lo baha drasticamente, e productividad lo subi y tur hende ta haya un oportunidad igual di por forma parti di e aparato gubermental di Aruba.

Drs. Robert Anjie
CURPA

Expresionnan haci den e articulo aki no necesariamente ta refleha opinion di ArenaPoliti.co